'বড়ো জাতিৰ নায়ক নহয়, বড়ো জাতিৰ খলনায়ক হৈছে প্ৰমোদ বড়ো। NDFBৰ নেতৃত্বক ঠগ-প্ৰৱঞ্চনাৰে প্ৰমোদ বড়োই স্বাক্ষৰ কৰাইছিল BTR চুক্তি। বড়ো জাতিক সেৱা কৰাৰ মানসিকতা নাই প্ৰমোদ বড়োৰ! BTCক ধ্বংস কৰি দুৰ্বল কৰিলে প্ৰমোদ বড়োয়ে!'সমাগত BTCৰ নিৰ্বাচনৰ পূৰ্বে এনেদৰে BTR প্ৰধান প্ৰমোদ বড়োক বড়ো জাতিৰ খলনায়ক আখ্যা নিখিল বড়ো জ্যেষ্ঠ নাগৰিক সন্থাৰ।
বড়ো জ্যেষ্ঠ নাগৰিক সন্থাৰ সাধাৰণ সম্পাদক অমৰ সিং ব্ৰহ্মই এক সংবাদ মেল সম্বোধন কৰি এনেদৰে চোকা সমালোচনা কৰে UPPL দলৰ সভাপতি তথা BTRৰ CEM প্ৰমোদ বড়োক। ব্ৰহ্মই লগতে অভিযোগ উত্থাপন কৰি কয়,'প্ৰমোদ বড়োই এবছুক নেতৃত্ব দিয়াৰ সময়ত চৰকাৰৰ পৃষ্ঠপোষকতাত কৰিছিল আন্দোলন। পৰবৰ্তী সময়ত, NDFBৰ নেতৃত্বক ৰাম ঠগন দি স্বাক্ষৰ কৰাইছিল BTR ,চুক্তিয়ে 'ধ্বংস কৰিলে বড়োলেণ্ডক'। BTR চুক্তিৰ পাছত পূৰ্বে লাভ কৰি অহা মৰ্যদা তথা ক্ষমতা নাইকিয়া হ'ল BTC, প্ৰবঞ্চনাৰে কৰা চুক্তিৰ বাবেই আজিও জেলৰ পৰা নোলাল ৰঞ্জন দৈমাৰী, শান্তি চুক্তি স্বাক্ষৰ কৰাৰ পাছতো শেষ নহ'ল NDFBৰ গোচৰ সমূহ। এই অভিযোগ জনগোষ্ঠীটোৰ জ্যেষ্ঠ নাগৰিক সমাজৰ সাধাৰণ সম্পাদক গৰাকীৰ।
কেৱল ইমানেই নহয়, সংগঠনটোৰ সাধাৰণ সম্পাদক ব্ৰহ্মই লগতে কয় যে, বড়ো জাতিক সেৱা কৰাৰ কোনো মানসিকতাই নাই প্ৰমোদ বড়োৰ, স্থানীয় বড়ো লোক সকলে লাভ কৰি অহা ঠিকা ঠুকুলি নাইকিয়া হ'ল প্ৰমোদ বড়োৰ দিনত,
BTR চুক্তিৰ পাছত আৰ্থিক ভাৱে দুৰ্বল হৈ পৰিছে বড়ো লোক সকল। বিগত পাঁচ বছৰত বড়ো ভূমিৰ আৰ্থিক দুৰৱস্থাৰ প্ৰসংগ উত্থাপন কৰি ব্ৰহ্মই পুনৰ কয় যে, হাগ্ৰামা মহিলাৰীয়ে BTC চুক্তি কৰাৰ সময়ত কেন্দ্ৰ আৰু ৰাজ্যৰ পৰা পুঁজি অহা দফা চুক্তিত ৰাখিছিল,কিন্তু ২০২০ত প্ৰমোদ বড়োই কৰা BTR চুক্তিত কৰ্তন কৰা হয় কেন্দ্ৰ আৰু ৰাজ্যৰ পৰা পুঁজি অহাৰ পথ, যাৰ বাবে পাঁচ বছৰত BTR লৈ পুঁজি অনাত ব্যৰ্থ হৈছে প্ৰমোদ বড়ো, পৰিণতিত ৰাজ্য চৰকাৰৰ অৰুনোদয় আঁচনি বিতৰণ বাদে BTRত কোনো কাম কৰিব পৰা নাই UPPL চৰকাৰে। এই অভিযোগ উত্থাপন কৰি লগতে সংগঠনটোৰ নেতা গৰাকীয়ে কয় যে বিগত পাঁচ বছৰত UPPL চৰকাৰৰ পাৰদৰ্শিতা একেবাৰে শূন্য বাবেই BJPয়ে এইবাৰ UPPLৰ সৈতে নিৰ্বাচন খেলিবলৈ সাহস গোটাব পৰা নাই।
আনহাতে UPPLৰ সৈতে থাকিলে BJPৰো নাওঁ ডুব যোৱাৰ ভয় খাইছে BJPৰ নেতৃত্বই বুলি মন্তব্য কৰে অমৰ সিং ব্ৰহ্মই। ছাত্ৰ ৰাজনীতিৰ পৰা সক্ৰিয় ৰাজনীতিত যোগদান কৰি BTRক চুইজাৰলেণ্ড গঢ়াৰ সপোন দেখুৱাই পাঁচ বছৰ শাসন সম্পূৰ্ণ কৰিবলৈ ওলোৱাৰ সন্ধিক্ষণত প্ৰমোদ বড়োৰ বিৰুদ্ধে নিখিল বড়ো জ্যেষ্ঠ নাগৰিক সন্থাই উত্থাপন কৰা এই অভিযোগ সমূহ জনতা জনাৰ্দনে কেনেদৰে গ্ৰহণ কৰে তাৰ উত্তৰৰ বাবে ৰব লাগিব নিৰ্বাচনী ফলাফল লৈ।
