ৰঙিয়াত চাঞ্চল্যকৰ পত্নী হত্যাৰ ক্ৰাইম চিন ৰিক্ৰিয়েচন। আৰক্ষীয়ে গ্ৰেপ্তাৰ কৰা পত্নীহন্তা স্বামী তথা ৰে'ল বিষয়া ৰাহুল কুমাৰ সিঙকলৈ অপৰাধ স্থলীত আৰক্ষীৰ ক্ৰাইম চিন ৰিক্ৰিয়েচন । লগতে ৰাহুল সিঙৰ স্বীকাৰোক্তিৰ ভিত্তিত পত্নীক হত্যা কৰা চোকা অস্ত্ৰ উদ্ধাৰ কৰিবলৈ সক্ষম আৰক্ষী।
উল্লেখ্য যে ৰঙিয়াৰ মুৰাৰাত যোৱা ৩ জুলাইত ৰাহুল কুমাৰ সিঙে পাচলি কটা চুৰিৰে গলত ৰেপি নৃশংসভাবে পত্নীক হত্যা কৰিছিল। ঘটনা সংঘটিত কৰাৰ পিছত ১৫ দিন ধৰি আত্মগোপন কৰি আছিল ৰাহুল কুমাৰ সিং । হত্যাকাৰী ৰাহুল কুমাৰ সিঙক অৱশেষত গণেশগুৰিৰ পৰা শুক্ৰবাৰে ৰঙিয়া আৰক্ষীয়ে গ্ৰেপ্তাৰ কৰে । দেওবাৰে আৰক্ষীয়ে প্ৰথমে ঘটনা সংঘটিত কৰাৰ দিনাখন ৰাহুলে পিন্ধি থকা টি ছাৰ্টটো ধৰমপুৰৰ পৰা উদ্ধাৰ কৰে । ইয়াৰ পিছতে ৰাহুলে পত্নীক হত্যা কৰা চুৰি খন দলিয়াই দিয়া পুখুৰীলৈ যায় ৰাহুল সিঙক লৈ আৰক্ষীক । তাত আৰক্ষীয়ে নিয়া ডুবাৰুৰ জৰিয়তে হত্যা কৰা চুৰি খনো উদ্ধাৰ কৰে ।
পিছত হত্যাকাণ্ড সংঘটিত কৰা ৰঙিয়াৰ মুৰাৰাস্থিত ভাড়াঘৰলৈ হত্যাকাৰী ৰাহুলকলৈ দণ্ডাধীশৰ উপস্থিতিত আৰক্ষীয়ে ক্ৰাইম চিন ৰিক্ৰিয়েচন কৰে । হত্যাকাৰীয়ে কোঠাৰ ভিতৰত কেনেকৈ পত্নীক হত্যা কৰিছিল সেয়া বুজাই দিয়ে। আৰক্ষীয়ে জনোৱা মতে পাৰিবাৰিক বিবাদৰ বাবে ৰাহুলে এই হত্যাৰ ঘটনা সংঘটিত কৰিছে বুলি মন্তব্য। পত্নীৰ সৈতে কাজিয়াৰ সূত্ৰপাত হৈ ৰাহুলে এই হত্যাকাণ্ড সংঘটিত কৰে বুলি আৰক্ষীৰ আগত মন্তব্য কৰে। শীঘ্ৰে হত্যাকাৰীৰ বিৰুদ্ধে চাৰ্জশ্বিট দাখিল কৰিব বুলি আৰক্ষীয়ে জনায় ।
