অন্ধকাৰতে থাকি যাব নেকি গৰুখুঁটি বহুমুখী প্ৰকল্পৰ হিচাপ ? গৰুখুঁটিৰ বহুমুখী প্ৰকল্পলৈ অনা কেইবাজনীও গীৰ গাইৰ অন্তৰ্ধান হোৱা অভিযোগ উত্থাপিত হৈছিল। গৰুখুঁটি প্ৰকল্পৰ ধনেৰে ক্ৰয় কৰা ৪০ জনীকৈ গীৰ গাই মন্ত্ৰীয়ে ক্ৰয় কৰা বুলি উত্থাপিত হোৱা অভিযোগক লৈ সৃষ্টি হৈছিল বিতৰ্ক। এতিয়া সেই গৰুখুঁটি বহুমুখী প্ৰকল্পৰ নামত কোনোধৰণৰ হিচাপ দিব নালাগে বুলি ৰাজহুৱাকৈ ঘোষণা কৰিছিল মুখ্যমন্ত্ৰীয়ে। ২১ জুলাইত ৰাজহুৱা সভাত মুখ্যমন্ত্ৰীয়ে গৰুখুঁটিৰ হিচাপ নিবিচাৰিব বুলি কৰা মন্তব্যক লৈ সৃষ্টি হৈছে প্ৰতিক্ৰিয়া। গৰুখুটি অসমৰ তীৰ্থস্থান আখ্যা দি বিধায়ক পদ্ম হাজৰিকাক গৰুখুটিৰ লাভ লোকচানৰ হিচাপ কাকো নিদিব বুলি কৈছিল মুখ্যমন্ত্ৰীয়ে।
তথ্য অনুসৰি,২০২৩ চনৰ ৬ মাৰ্চৰ লৈকে গৰুখুঁটিৰ বহুমুখী প্ৰকল্পলৈ ১৪ কোটি ৫২ লাখ ৯৩ হাজাৰ ৩৪৮ টকা মোকোলাই দিছিল ৰাজ্য চৰকাৰে। ৰাজকোষৰ টকাৰে গৰুখুটি প্ৰকল্পৰ বাবে চৰকাৰে সাহায্য কেইবাশ কোটি টকা দিছিল যদিও সেই ধনৰ হিচাপে দিব নালাগে বুলি মন্তব্য কৰিছিল মুখ্যমন্ত্ৰীয়ে। ২১ জুলাইত গৰুখুঁটি প্ৰকল্পক লৈ লাভ-লোকচানৰ হিচাপ কৰিবলৈ আমি ব্যৱসায়ী নহয় বুলি মন্তব্য কৰিছিল মুখ্যমন্ত্ৰীয়ে। মঙলদৈৰ গৰুখুঁটি অঞ্চলত আৰম্ভ কৰা কৃষি প্ৰকল্পৰ নেতত্বত আছিল নদুৱাৰ সমষ্টিৰ বিজেপিৰ বিধায়ক পদ্ম হাজৰিকা।
