অগপ-বিজেপিৰ মিত্ৰতাত চিৰাল ফাঁট! অগপ কৰ্মীক খেদি খেদি প্ৰহাৰ বিজেপি কৰ্মীৰ! জিলাই জিলাই অগপ-বিজেপি কৰ্মীৰ মাজত কুৰুক্ষেত্ৰ! মন্ত্ৰীত্বৰ স্বাৰ্থত অতুল বৰা আৰু কেশৱ মহন্তই বিজেপিৰে মিত্ৰতা অব্যাহত ৰাখিলেও অগপ আৰু বিজেপিৰ তৃণমূল কৰ্মীৰ মাজত নাই কিঞ্চিত মানো সদ্ভাৱ, সমন্বয়, সহযোগিতা। যি অগপৰ হাতীৰ নেগুৰত ধৰি বিজেপিয়ে এদিন অসমত প্ৰৱেশ কৰিছিল সেই অগপৰ কৰ্মীকে আজি খেদি খেদি প্ৰহাৰ কৰিলে বিজেপি কৰ্মীয়ে। এক কথাত হাতীয়ে যেন আজি নেগুৰ দাঙি পলাব লগীয়া পৰিস্থিতি হল। প্ৰসংগ : পঞ্চায়ত গঠন। পঞ্চায়ত দখলক কেন্দ্ৰ কৰি অগপ BJPৰ মাজত ঠায়ে ঠায়ে আৰম্ভ হৈছে তীব্ৰ মতানৈক্য। পৰিস্থিতি এনে পৰ্যায় পাইছে গৈ যে, বুধবাৰে দুটাকৈ স্থানত অগপ কৰ্মীক খেদি খেদি প্ৰহাৰ কৰিলে BJP কৰ্মীয়ে।
বুধবাৰৰ দিনটোত গোলাকগঞ্জ সম জিলা কাৰ্যলয়ক অগপ BJPৰ কৰ্মীয়ে পৰিণত কৰিলে মহাভাৰতৰ কুৰুক্ষেত্ৰ লৈ। চাওক এই দৃশ্য সমূহলৈ । BJP নেতা তথা প্ৰাক্তন বিধায়ক অশ্বিনী ৰায় সৰকাৰ নেতৃত্বত এদল উন্মাদ সমৰ্থকে খেদি খেদি প্ৰহাৰ কৰা এই লোকজন অগপ নেতা অশোক প্ৰধানী। গৰুচোৰ-ছাগলী চোৰ ধৰি উন্মাদ ৰাইজে গণ প্ৰহাৰ কৰাৰ দৰেই অশোক প্ৰধানীক এই সকল BJP কৰ্মীয়ে কৰিলে গণ প্ৰহাৰ।
গোলাকগঞ্জৰ দৰেই পঞ্চায়ত গঠনক কেন্দ্ৰ কৰি ৰূপহীহাটৰ শিঙিমাৰীটো দেখা গল অগপ BJPৰ কৰ্মীৰ মাজত কুৰুক্ষেত্ৰ। অগপ নেত্ৰী অঞ্জুমা বেগমৰ বাহনত ভয়ংকৰ আক্ৰমণ চলালে BJP সমৰ্থকে। স্থানীয় BJP নেতা মজিবুৰ ৰহমানৰ নেতৃত্বত ভেৰণীয়া এদল গুণ্ডাই অগপ নেত্ৰী গৰাকীক আক্ৰমণ কৰাৰ উত্থাপিত হৈছে অভিযোগ। এই আক্ৰমণত আঘাতপ্ৰাপ্ত হয় অঞ্জুমা বেগমৰ লগতে কেইবগৰাকী।
দলীয় স্বাৰ্থক জালাঞ্জলি দি অগপক BJPৰ হাতত বন্ধকত ৰাখি নিজস্ব স্বাৰ্থৰ সিদ্ধি কৰি অহা অতুল বৰা - কেশৱ মহন্তই BJPৰে আজন্ম মিত্ৰতাৰ কথা কৈ থকাৰ সময়ত তৃণমূল পৰ্যায়ত আৰম্ভ হোৱা এই ক্ষোভ-অসন্তুষ্টি তথা BJPৰ নেতা কৰ্মীৰ দ্বাৰা দলীয় কৰ্মী লাঞ্চিত হোৱা দেখি চকু খোল খাব নে অতুল বৰা আৰু কেশৱ মহন্তৰ নে মন্ত্ৰীত্বৰ ৰঙা লাইটৰ মোহত মোহাচ্ছন্ন হৈ ধৃতৰাষ্ট্র হৈয়ে থাকিব তাৰ উত্তৰ বিচাৰি এতিয়া অপেক্ষাত দলটোৰ কৰ্মী সকল।
