বিহাৰৰ বিধানসভা নিৰ্বাচনৰ পূৰ্বে সংকটত পৰিছে নীতিশ কুমাৰৰ মুখ্যমন্ত্ৰী চকী। মুখ্যমন্ত্ৰী নীতিশ কুমাৰৰ বিৰুদ্ধে এক প্ৰকাৰে মুকলি বিদ্ৰোহ বিজেপি নেতৃত্বাধীন NDA মিত্ৰদলৰ নেতা চিৰাগ পাছৱানৰ।
বিহাৰৰ আইন-শৃংখলা জনিত পৰিস্থিতিক লৈ মুখ্যমন্ত্ৰী নীতিশ কুমাৰক কাঠগড়াত থিয় কৰিলে মিত্ৰদলৰ নেতা চিৰাগ পাছৱানে। বিহাৰৰ আইন-শৃংখলা জনিত পৰিস্থিতি নিয়ন্ত্ৰণত মুখ্যমন্ত্ৰী নীতিশৰ চৰকাৰ ব্যৰ্থ হোৱাৰ অভিযোগ কেন্দ্ৰীয় মন্ত্ৰী তথা NDA মিত্ৰদলৰ নেতা চিৰাগ পাছৱানৰ। আসন্ন বিধানসভা নিৰ্বাচনৰ পূৰ্বে বিহাৰত সংঘটিত অপৰাধজনিত ঘটনাক লৈ উদ্বিগ্ন মিত্ৰদল LJP ৰ মূৰব্বী চিৰাগ পাছৱান।
বিহাৰত অপৰাধীৰ সন্মুখত নীতিশ চৰকাৰৰ প্ৰশাসন সম্পূৰ্ণৰূপে নতমস্তক হোৱা বুলি দাবী কৰিলে NDA মিত্ৰদলৰ নেতা চিৰাগ পাছৱানে।বিহাৰত ধাৰাবাহিকভাবে হত্যা, লুটপাট,অপহৰণৰ দৰে ঘটনা সংঘটিত হোৱা বুলি মুখ্যমন্ত্ৰী নীতিশক টাৰ্গেট কৰিলে চিৰাগ পাছৱানে।বিহাৰত নীতিশ কুমাৰৰ নেতৃত্বাধীন চৰকাৰলৈ সমৰ্থন দি অনুতপ্ত বুলি মন্তব্য কৰিলে কেন্দ্ৰীয় মন্ত্ৰী চিৰাগ পাছৱানে।
শেহতীয়াকৈ দিন দুপৰতে বিহাৰৰ ৰাজধানী চহৰ পাটনাত দুৰ্বৃত্তই ঘৰৰ চৌহদতে গুলীয়াই হত্যা কৰিছিল এগৰাকী ব্যৱসায়ীক।ব্যৱসায়ীজনৰ হত্যাৰ প্ৰসংগত সাংবাদিকে কৰাৰ প্ৰশ্নোত্তৰত মুখ্যমন্ত্ৰী নীতিশৰ চৰকাৰ-প্ৰশাসনৰ বিৰুদ্ধে সৰৱ হ'ল চিৰাগ পাছৱান।
উল্লেখযোগ্য যে,NDA ৰ চৰকাৰৰ সহযোগী দল LJP ৰ মূৰব্বী চিৰাগে চৰকাৰক সমালোচনা কৰাৰ বিপৰীতে প্ৰশংসা কৰিছিল বিৰোধী দলৰ নেতা প্ৰশান্ত কিশোৰক। শেহতীয়াকৈ বিহাৰত বিজেপিৰ দায়িত্বভাৰ অমিত শ্বাহে নিজৰ কান্ধত লোৱাৰ পাছৰে পৰা চাপত আছে মুখ্যমন্ত্ৰী নীতিশ। বিহাৰৰৰ বিধানসভা নিৰ্বাচনত বিজেপি দলে অধিক আসন লাভ কৰিলে মুখ্যমন্ত্ৰী আসনৰ পৰা গাদীচ্যুত হ'ব পাৰে নীতিশ কুমাৰ।এনে এক জটিল ৰাজনৈতিক প্ৰেক্ষাপটত NDA চৰকাৰৰ সহযোগী দলে মুখ্যমন্ত্ৰী নীতিশক সমালোচনা কৰাটো আশ্বৰ্যজনক।
