কাৰাগাৰত থাকিও চৰকাৰী দৰমহা লাভ কৰি থকা এগৰাকী শিক্ষকৰ কাহিনী । হত্যাৰ গোচৰত ৪ মাহ কাৰাগাৰত থাকিও চৰকাৰী দৰমহা লাভ কৰি আছে এইগৰাকী শিক্ষকে বুলি অভিযোগ উত্থাপন হৈছে। ৰূপহীহাট হায়াৰ ছেকেণ্ডেৰীৰ বিষয় শিক্ষক মাইনুল হকৰ বিৰুদ্ধে এই অভিযোগ উত্থাপন হৈছে ।
নগাঁও সদৰ থানাত ৰুজু হৈ থকা গোচৰৰ ভিত্তিত নগাঁও বিশেষ কাৰাগাৰত ৪মাহ ধৰি বন্দী হৈ আছে শিক্ষক মাইনুল হক। পিছে শিক্ষা বিভাগে চিকিৎসাজনিত ছুটী প্ৰদান কৰিছে মাইনুলক। অথচ অপৰাধজনিত ঘটনাত বন্দী জীৱন কটাইছে শিক্ষক মাইনুলে। এতিয়া বিভিন্ন গৰাকীৰ অভিযোগ যে, মাইনুলে নগাঁও শিক্ষা বিভাগক বিপথে পৰিচালিত কৰিছে ।
১২ বছৰৰ পূৰ্বে মাইনুলৰ বিৰুদ্ধে ৰুজু হৈছিল ভাৰতীয় দণ্ডবিধি আইনৰ ১২০(বি), ৩০২ ধাৰাত গোচৰ। নগাঁও সদৰ আৰক্ষী থানাত ৩৭৪/২০১২ নম্বৰত ৰুজু হৈছিল গোচৰটো। নগাঁও আৰক্ষীয়ে দোষী সাব্যস্ত কৰি দাখিল কৰিছিল অভিযোগনামা। আৰু সেই গোচৰৰ ভিত্তিতে মাইনুলক কাৰাগাৰলৈ প্ৰেৰণ কৰিছিল সত্ৰ ন্যায়াধীশৰ আদালতে। পিছে ১ মাৰ্চৰ পৰা বৰ্তমানলৈকে চিকিৎসাজনিত কাৰণত ছুটী লৈ মাইনুলে লাভ কৰি আছে চৰকাৰী দৰমহা। এই ঘটনাক লৈ নগাঁৱত তীব্ৰ প্ৰতিক্ৰিয়াৰ সৃষ্টি হৈছে।
