পাকিস্তানৰ সৈতে বেপাৰ কৰা আমেৰিকাৰ ওচৰত শিৰণত নহয় ভাৰত। আমেৰিকাৰ ৰাষ্ট্ৰপতি ড'নাল্ড ট্ৰাম্পৰ সকিয়নিলৈ ভয় নকৰে ভাৰতৰ প্ৰধানমন্ত্ৰী নৰেন্দ্ৰ মোদীয়ে। আমেৰিকাৰ পৰা ভাৰতে ক্ৰয় কৰাৰ সম্ভাৱনা নাই F-35 যুদ্ধ বিমান। নৰেন্দ্ৰ মোদীৰ আমেৰিকা ভ্ৰমণৰ সময়ত ভাৰতক পঞ্চম প্ৰজন্মৰ F-35 যুদ্ধ বিমান ক্ৰয় কৰাৰ প্ৰস্তাৱ দিছিল ৰাষ্ট্ৰপতি ড'নাল্ড ট্ৰাম্পে। কিন্তু আমেৰিকাৰ ৰাষ্ট্ৰপতি গৰাকীয়ে দিয়া অফাৰ প্ৰত্যাখ্যান কৰিব পাৰে দিল্লীয়ে। ভৱিষ্যতেও আমেৰিকাৰ সৈতে কোনোধৰণৰ বৃহৎ সামৰিক চুক্তি নকৰিব পাৰে ভাৰতে। এটা বিশেষ মন্ত্ৰালয়ৰ শীৰ্ষ সূত্ৰৰ দাবীৰ ভিত্তিত এই গুৰুত্বপূৰ্ণ খবৰ প্ৰকাশ কৰিছে ব্লুমবাৰ্গে।
উল্লেখযোগ্য যে,৩০ জুলাইত ভাৰতৰ বিৰুদ্ধে ২৫ শতাংশ শুল্ক আৰোপ কৰিছিল আমেৰিকাৰ ৰাষ্ট্ৰপতি ড'নাল্ড ট্ৰাম্পে। আমেৰিকাৰ ৰাষ্ট্ৰপতি গৰাকীৰ এই সিদ্ধান্তৰ পাছতেই হাহাকাৰ লাগিছিল ভাৰতৰ বাণিজ্যিক ক্ষেত্ৰত। চলিত বৰ্ষৰ এপ্ৰিল মাহত ভাৰত ভ্ৰমণলৈ অহা আমেৰিকাৰ উপ-ৰাষ্ট্ৰপতি গৰাকীয়েও F-35 যুদ্ধ বিমান ক্ৰয় কৰিবলৈ প্ৰস্তাৱ দিছিল ভাৰতক। ৰাষ্ট্ৰপতি ড'নাল্ড ট্ৰাম্পে আৰোপ কৰা শুল্কৰ বিপৰীতে আমেৰিকাৰ অত্যাধুনিক যুদ্ধ বিমান ক্ৰয় নকৰাৰ সিদ্ধান্ত ল'ব পাৰে মোদী চৰকাৰে।
অৱশ্যে সামৰিক দিশৰ পৰা স্পৰ্শকাতৰ বিষয়টোৰ সন্দৰ্ভত এতিয়াও কোনো আনুষ্ঠানিক ঘোষণা কৰা নাই দিল্লীয়ে। শেহতীয়াকৈ আমেৰিকাৰ F-35 যুদ্ধ বিমানৰ কেইবাটাও বিসংগতি ধৰা পৰাৰ পাছতেই যুদ্ধ বিমানখনৰ বিশ্বাসযোগ্যতাক লৈ সৃষ্টি হৈছিল বিতৰ্ক।
