ৰাজ্যত অব্যাহত থকা উচ্ছেদ অভিযানৰ সময়তে শেহতীয়াকৈ উত্থাপিত হৈছে কেইবাটাও প্ৰশ্নৰ! উচ্ছেদ অভিযানৰ প্ৰকৃত লক্ষ্য খিলঞ্জীয়াৰ বাবে ভূমি ৰক্ষা নে সাম্প্ৰদায়িকতাৰ ৰহণ দিয়াৰ চেষ্টা ? এই প্ৰশ্ন উত্থাপিত হৈছে অতি শেহতীয়াকৈ মুখ্যমন্ত্ৰীৰ কেতবোৰ মন্তব্যৰ পাছতেই ।
উল্লেখযোগ্য যে, ৰাজ্যৰ প্রান্তে প্রান্তে চলিছে উচ্ছেদ অভিযান। VGR-PGR, বনভূমি, জলাশয়ত হোৱা বেদখলৰ বিৰুদ্ধে চলা এই উচ্ছেদ অভিযানক খিলঞ্জীয়া অসমীয়াই সমৰ্থন কৰিছে যদিও এই উচ্ছেদক লৈ শেহতীয়াকৈ মুখ্যমন্ত্ৰীয়ে আৰম্ভ কৰিছে কুটিল সাম্প্ৰদায়িক ৰাজনীতি। ২ আগষ্টৰ পৰা আৰম্ভ হোৱা মিছন BTCৰ জনসভাত ভাগ লৈ মুখ্যমন্ত্ৰীয়ে বেদখল আৰু উচ্ছেদক লৈ কৰিছে কেতবোৰ বিতৰ্কিত মন্তব্য। BTRত অনুষ্ঠিত হোৱা জনসভা সমূহত ভাগ লৈ মুখ্যমন্ত্ৰীয়ে দুটা ভাগত বিভক্ত কৰিছে বেদখলক,দুটা ভাগত বিভক্ত কৰিছে উচ্ছেদক।
প্ৰথমতে মুখ্যমন্ত্ৰীৰ মতে চৰকাৰে 'বাংলাদেশী' মূলৰ লোকৰ দ্বাৰা হোৱা বেদখলকহে বেদখল বুলি ভাৱে বুলি কৰিছে মন্তব্য। ইয়াৰ বিপৰীতে অন্য লোকৰ দ্বাৰা হোৱা বেদখলক বেদখল বুলি নধৰে বুলি মুকলিকৈ মন্তব্য কৰে মুখ্যমন্ত্ৰীয়ে। মুখ্যমন্ত্ৰীয়ে এই মন্তব্য কৰাৰ লগতে এখোপ ওপৰলৈ গৈ কয় যে,উচ্ছেদ যাক কৰিব লাগে সেই সকলকহে কৰা হ'ব। কিন্তু হিন্দু বাঙালী, বিহাৰী, গোর্খা আৰু অন্যান্য সম্প্ৰদায়ৰ বেদখলকাৰীক নকৰে উচ্ছেদ। সংবিধান ৰক্ষা তথা পক্ষপাতীত্ব নকৰাৰ শপত লোৱা ৰাজ্যৰ মুখ্যমন্ত্ৰী গৰাকীয়ে কৰা এই মন্তব্যৰ পাছতেই এতিয়া উত্থাপিত হৈছে নানান প্ৰশ্নৰ। প্ৰশ্ন উঠিছে মুখ্যমন্ত্ৰীৰ এই মন্তব্য সংবিধানৰ অনুচ্ছেদ ১৪ৰ বিৰোধী নহয় নে ?
জাতি, ধৰ্ম বিচাৰ কৰি চৰকাৰে উচ্ছেদ চলোৱা কাৰ্য কিমানদূৰ গ্রহণযোগ্য ?
যদি বেদখল মুক্ত কৰাই চৰকাৰৰ প্ৰকৃত উদ্দেশ্য তেন্তে সকলো চৰকাৰী ভুমি বেদখল মুক্ত নকৰি কেৱল এটা বিশেষ শ্ৰেণীৰ লোকক উচ্ছেদ কৰিলে কেনেকৈ ৰক্ষা পৰিব খিলঞ্জীয়াৰ ভূমি ?
কাৰণ ৰাজ্যৰ ভিন্ন প্ৰান্তত মিঞাৰ সমান্তৰাল ভাৱে বৃহৎ ভূমি বেদখল কৰিছে হিন্দু বাঙালী তথা বহিঃ ৰাজ্যৰ পৰা অহা লোকে শেহতীয়াকৈ কাৰ্বি আংলং ৰ ভিন্ন প্ৰান্তত হিন্দু বাঙালী আৰু বহিঃৰাজ্যৰ পৰা অহা লোকৰ দ্বাৰা হোৱা বেদখল মুক্ত কৰিবলৈ দাবী তুলিছিল কাৰ্বি আংলঙৰ কেইবাটাও সংগঠনে।
এনে নানান প্ৰশ্নই এতিয়া সচেতন ৰাইজৰ মাজত প্ৰতিক্ৰিয়া সৃষ্টি কৰিছে যদিও মুখ্যমন্ত্ৰীৰ পৰা ইয়াৰ উত্তৰ বিচৰাটো পৰ্বতত গৈ কাছৰ কণী বিচৰা লেখীয়া হব বুলি চলিছে চর্চা ...
