পুৱাই ক্ষেত্ৰীৰ ৰাজপথত শেষ হৈ গ’ল দুটি জীৱন। বুধবাৰে আছিল কন্যাৰ স্কুল, পুৱতি নিশাই পাতিদৰঙৰ পৰা ৰহালৈ উভতিছিল গজেন্দ্ৰ মোহন দেৱ শৰ্মা আৰু পত্নী অৰ্চনা দেৱী। কিন্তু ক্ষেত্ৰীত মুহূৰ্ততে সকলো শেষ হৈ গ’ল দম্পতীৰ জীৱন। কণমানি কন্যা কৃপালিনী গাৰ্গে হাস্পতালত জীৱন-মৃত্যুৰে যুঁজি হাৰ মানিলে।
দুৰ্ঘটনাগ্ৰস্ত বাহনখন মঙলদৈৰ পৰা ৰহা অভিমুখী আছিল। ৰহা মহাবিদ্যালয়ৰ অৱসৰপ্ৰাপ্ত উপাধ্যক্ষ গজেন্দ্ৰ মোহন দেৱ শৰ্মা আৰু পত্নী অৰ্চনা দেৱী, কন্যা কৃপালিনী গাৰ্গৰ সৈতে পৰিয়ালটো পুৱতি নিশা ওলাই আহিছিল ৰহাৰ অভিমুখে। গন্তব্য স্থান পাবলৈ কিছু বাট থকাৰ পূৰ্বে শেষ হৈ গ’ল সকলো। সোমবাৰে ছিপাঝাৰত পূজা আগবঢ়াবলৈ গৈছিল পৰিয়ালটো। সোমবাৰে পূজা আগবঢ়াই নিশা শহুৰৰ ঘৰতে আছিল পৰিয়ালটো। পাতিদৰঙৰ শহুৰৰ পৰা পুৱতি নিশা ৩ মান বজাত সকলোকে হাঁহিমুখে মাত দি ওলাই গৈছিল ৩জনীয়া পৰিয়ালটো। চূৰ্ণ-বিচূৰ্ণ হৈ যোৱা বাহনৰ মাজত প্ৰায় ৫ ঘণ্টা ধৰি আবদ্ধ হৈ ৰৈছিল দুয়োৰে মৃতদেহ। ক্ষেত্ৰী আৰক্ষী আৰু F&ESৰ লোকে অভিযান চলাই ৫ ঘন্টাৰ মূৰত উদ্ধাৰ কৰে দম্পতীৰ মৃতেদহ। মৃতদেহ দুটা উদ্ধাৰ কৰি মৰণোত্তৰ পৰীক্ষাৰ বাবে GMCHলৈ প্ৰেৰণ কৰে। প্ৰত্যক্ষদৰ্শীৰ ভাষ্য অনুসৰি ঘণ্টাত ৮০ৰ পৰা ১০০ কিলোমিটাৰ গতিত অহা বাহনখনে নিয়ন্ত্ৰণ হেৰুৱাই পথৰ ডিভাইদাৰত থকা এদাল গছত খুন্দা মাৰে।
জানিব পৰা অনুসৰি কন্যা কৃপালিনী গাৰ্গৰ আজি পুৱা স্কুল থকাৰ বাবেই পুৱতি নিশাই ৰাওনা হৈছিল ৰহালৈ । মঙলদৈৰ নিজৰ বাসগৃহত থকা গজেন্দ্ৰ মোহন দেৱ শৰ্মা ককায়েক দ্বীজেন্দ্ৰ মোহন দেৱ শৰ্মাই কোৱা অনুসৰি কিছু দিনৰ পূৰ্ৱে চাৰি ধাম দৰ্শন কৰি আহিছিল গজেন্দ্ৰ মোহনৰ পৰিয়াল।
উল্লেখ্য যে মাৰুতি S-CROSS বাহনখনে ক্ষেত্ৰীৰ ৰাষ্ট্ৰীয় ঘাইপথত সৃষ্টি হোৱা কৃত্ৰিম বানৰ বাবে নিয়ন্ত্ৰণ হেৰুৱাই পথৰ ডিভাইডাৰৰ মাজত থকা এডাল প্ৰকাণ্ড গছত খুন্দা মাৰিছিল। অভিযোগ অনুসৰি ৰাষ্ট্ৰীয় ঘাইপথছোৱাৰ এনে দুৰৱস্থাৰ বাবেই প্ৰতিদিনে উক্ত স্থানত সৰু-বৰ দুৰ্ঘটনা সংঘটিত হৈ আহিছে।
