NCERTৰ অষ্টম শ্ৰেণীৰ ইতিহাসৰ পাঠ্যপুথিত আহোম ইতিহাসৰ বিকৃত ব্যাখ্যাৰ অভিযোগ। শীঘ্ৰেই শুধৰণিৰ আহ্বান জনাই কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানলৈ পত্ৰ লিখিলে গৌৰৱ গগৈয়ে।
NCERT ৰ সংশোধিত অষ্টম শ্ৰেণীৰ ইতিহাসৰ পাঠ্যপুথিত আহোম সাম্ৰাজ্যৰ সন্দৰ্ভত বিকৃত তথ্য প্ৰকাশৰ অভিযোগ উত্থাপন কৰিছে। উপস্থাপন কৰা তথ্যবোৰৰ ভিতৰত আহোমসকলৰ উৎপত্তিৰ ভুল বৰ্ণনা, পাইক প্ৰথাৰ ভুল চৰিত্ৰায়ন, ১৬৬৩ চনৰ ঘিলাধাৰী ঘাটৰ সন্ধিৰ ভুল ব্যাখ্যা কৰাৰ লগতে সামাজিক-ৰাজনৈতিক সংহতিৰ অতি সৰলীকৰণ, মূল সাংস্কৃতিক আৰু প্ৰশাসনিক অৱদান বাদ দিয়া আদি বহু আসোঁৱাহ থকাৰ অভিযোগ উত্থাপন হৈছে।
গৌৰৱ গগৈয়ে কৰা অভিযোগ অনুসৰি এনে অশুদ্ধতাই আহোম ইতিহাস তথা ঐতিহাসিক মৰ্যদাক ম্লান কৰাৰ লগতে আহোমসকলক ভেঙুচালি কৰাৰ সমান্তৰালভাৱে অসমৰ সাংস্কৃতিক ঐতিহ্যক লৈ ভুল ধাৰণা গঢ়ি তুলিব।
অসমৰ বিষয় বিশেষজ্ঞৰ সৈতে অধ্যায়টো শীঘ্ৰে পুনৰীক্ষণ কৰাৰ লগতে সুষম, প্ৰামাণিক ঐতিহাসিক তথ্যসমূহ ৰাষ্ট্ৰীয় পাঠ্যক্ৰমত অন্তৰ্ভুক্ত কৰাৰ আহ্বান জনায় যোৰহাটৰ সাংসদ তথা লোকসভাৰ বিৰোধী দলৰ উপ-নেতা গৌৰৱ গগৈয়ে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানলৈ লিখা এখন পত্ৰ প্ৰেৰণ কৰি “Tribes, Nomads and Settled Communities” শীৰ্ষক অধ্যায়টো সংশোধন কৰিবলৈ আহ্বান জনাই। অন্যথা অসমৰ ইতিহাসৰ বিষয়ে ছাত্ৰ-ছাত্ৰী ভুল বুজাৰ আশংকা আছে বুলিও মন্তব্য কৰে সাংসদ গৌৰৱ গগৈয়ে।
