ৰঙিয়াৰ সংহত আন্তঃগাঁথনি উন্নয়ন কেন্দ্ৰৰ অধীনৰ এটা কোম্পানী শীঘ্ৰে বন্ধ হোৱাৰ দিশে। কোটি কোটি টকাৰ লোকচানৰ বাবেই শীঘ্ৰে এই সিদ্ধান্ত ল'বলৈ বাধ্য হ'ব বুলি মন্তব্য স্বত্বাধিকাৰীৰ। প্ৰায় ৬০ ৰ পৰা ৭০ টা পৰিয়াল জড়িত হৈ থকা ৰঙিয়াৰ মৰাণজানাস্থিত এই নাৰায়ণী হাই টেক প্ৰাইভেট লিমিটেড কোম্পানীৰ বন্ধ হোৱাৰ দিশে ।
ঘটনাৰ বিৱৰণী অনুসৰি, এই কোম্পানীটোৰ গাতে লাগি আছে আন এটা কোম্পানী যাক সামগ্ৰী প্ৰস্তুতৰ কাৰণে প্ৰতিদিনে হাজাৰ হাজাৰ লিটাৰ পানীৰ দৰকাৰ, আৰু সেই পানী তেওঁলোকে কৃত্ৰিম ভাৱেও সংৰক্ষণ কৰি আহিছে। যাৰ ফলত এজাক বৰষুণ দিলেই পানীয়ে ডুবাই পেলাই এই নাৰায়ণী হাই টেক নামৰ কাগজৰ কাৰ্টন প্ৰস্তুতকাৰী এই কোম্পানীটোক। বিগত চাৰি পাঁচ মাহ ধৰি এই সমস্যাৰ সন্মুখীন হৈ আহিছে কোম্পানীটো। এই বিষয়ে কৃত্ৰিম বানপানীৰ সৃষ্টি কৰা কোম্পানীৰ স্বত্বাধিকাৰীৰ সৈতে বহু বাৰ আলোচনাৰ পাছতো সুফল নোপোৱাত এইবাৰ নাৰায়ণী হাই টেকৰ স্বত্বাধিকাৰীয়ে বিভাগীয় কৰ্তৃপক্ষক যোগাযোগ কৰি সমগ্ৰ ঘটনা অৱগত কৰে। লগতে কাষ চাপে সংবাদ মাধ্যমৰো। চাৰিমাহে পানীৰ তলত এইদৰে দুৰ্ভোগ ভুগি আছে নাৰায়ণী হাই টেক কোম্পানীটোৱে।
মঙলবাৰে এইদৰে ৰঙিয়াৰ চক্ৰ বিষয়াৰ উপস্থিতিত ৰঙিয়া আৰক্ষীয়ে বিষয়টো নিৰীক্ষণ কৰিবলৈ ঘটনাস্থলীত উপস্থিত হয়।
শীঘ্ৰে এই বিষয়টো সমাধান কৰি দিবলৈ প্ৰশাসন তথা চৰকাৰক আহ্বান জনাইছে কোম্পানীটোৰ স্বত্বাধিকাৰী তথা কৰ্মচাৰীয়ে।
