প্ৰধানমন্ত্ৰী নৰেন্দ্ৰ মোদীৰ স্নাতক ডিগ্ৰীৰ বিতৰ্কৰ সন্দৰ্ভত দিল্লী উচ্চ ন্যায়ালয়ে প্ৰদান কৰিব ৰায়দান। ২০ আগষ্টত প্ৰধানমন্ত্ৰী মোদীৰ ডিগ্ৰী বিতৰ্কৰ সন্দৰ্ভত ৰায়দানৰ দিন ধাৰ্য্য কৰিছিল দিল্লী উচ্চ ন্যায়ালয়ে। কিন্তু প্ৰধানমন্ত্ৰী মোদীৰ স্নাতক ডিগ্ৰীৰ বিতৰ্কৰ ৰায়দানৰ দিনা দিল্লী উচ্চ ন্যায়ালয়ত উপস্থিত নাছিল ন্যায়াধীশ। প্ৰধানমন্ত্ৰীৰ স্নাতক ডিগ্ৰীৰ বিতৰ্কৰ সন্দৰ্ভত ৰায়দান কৰাৰ কথা আছিল দিল্লী উচ্চ ন্যায়ালয়ৰ ন্যায়াধীশ শচীন দত্তৰ বিচাৰপীঠে।
ন্যায়াধীশ গৰাকী উপস্থিত নথকাৰ বাবে ২০ আগষ্টৰ সলনি ২৫ আগষ্টলৈ পিছুৱাই দিয়া হ'ল ৰায়দানৰ দিন। অৰ্থাৎ ২৫ আগষ্ট পোহৰলৈ আহিব প্ৰধানমন্ত্ৰী গৰাকীৰ স্নাতক ডিগ্ৰীৰ বিতৰ্কৰ প্ৰকৃত সত্য।
মোদীৰ স্নাতক ডিগ্ৰীৰ সন্দৰ্ভত তথ্য প্ৰকাশ কৰিবলৈ দিল্লী বিশ্ববিদ্যালয়ক নিৰ্দেশ দিছিল কেন্দ্ৰীয় কেন্দ্ৰীয় তথ্য আয়োগে। কেন্দ্ৰীয় তথ্য আয়োগৰ নিৰ্দেশনাক প্ৰত্যাহ্বান জনাই দিল্লী উচ্চ ন্যায়ালয়ৰ দ্বাৰাস্থ হৈছিল দিল্লী বিশ্ববিদ্যালয়।
চলিত বৰ্ষৰ ২৭ ফেব্ৰুৱাৰীত বিশ্ববিদ্যালয়খনৰ আবেদনৰ শুনানি গ্ৰহণ কৰি ৰায়দান সংৰক্ষিত ৰাখিছিল দিল্লী উচ্চ ন্যায়ালয়ে। ২০ আগষ্টত ৰায়দানৰ দিন ধাৰ্য কৰা হৈছিল যদিও ৰায়দান কৰিবলৈ দিল্লী উচ্চ ন্যায়ালয়ত উপস্থিত নহ'ল ন্যায়াধীশ শচীন দত্ত। ২০ আগষ্টৰ সলনি ২৫ আগষ্টলৈ পিছুৱাই দিয়া হৈছে প্ৰধানমন্ত্ৰী মোদীৰ স্নাতক ডিগ্ৰীৰ বিতৰ্কৰ ৰায়দান। ১৯৭৮ চনত দিল্লী বিশ্ববিদ্যালয়ৰ পৰা স্নাতক ডিগ্ৰী গ্ৰহণ কৰা বুলি দাবী কৰিছিল প্ৰধানমন্ত্ৰী নৰেন্দ্ৰ মোদীয়ে ।
প্ৰধানমন্ত্ৰী নৰেন্দ্ৰ মোদীৰ স্নাতক ডিগ্ৰী ভুৱা বুলি অভিযোগ উত্থাপিত হৈছিল। দিল্লী বিশ্ববিদ্যালয়ৰ পৰা মোদীয়ে লাভ কৰা স্নাতক ডিগ্ৰীৰ প্ৰমাণ পত্ৰ বিচাৰি RTI আবেদন কৰিছিল আম আদমী পাৰ্টিৰ এগৰাকী নেতাই
২০১৬ চনৰ ২১ ডিচেম্বৰত কেন্দ্ৰীয় তথ্য আয়োগে ১৯৭৮ চনত প্ৰধানমন্ত্ৰী মোদীয়ে দিল্লী বিশ্ববিদ্যালয়ৰ পৰা স্নাতক ডিগ্ৰী উত্তীৰ্ণ হোৱা সকলো ৰেকৰ্ড পৰিদৰ্শনৰ নিৰ্দেশ দিছিল যদিও ব্যক্তিগত গোপনীয়তাৰ দোহাই দি দিল্লী বিশ্ববিদ্যালয় কৰ্তৃপক্ষই ৰাজহুৱা কৰা নাছিল প্ৰধানমন্ত্ৰী নৰেন্দ্ৰ মোদীৰ স্নাতক ডিগ্ৰীৰ প্ৰমাণ পত্ৰ।যিগৰাকী নেতাই একেৰাহে দীৰ্ঘসময়ৰ বাবে ভাষণ দি জনতাক মোহাচ্ছন্ন কৰি ৰাখিব পাৰে সেইগৰাকী নেতাৰ শিক্ষাগত অৰ্হতাক লৈ কিয় প্ৰশ্ন উঠিছে বুলি সমালোচনা কৰিছে দেশৰ বিৰোধী দল সমূহে।
