উত্তৰাখণ্ডৰ ৰুদ্ৰপুৰত মাদ্ৰাছাৰ বিৰুদ্ধে চৰকাৰী ব্যৱস্থা গ্ৰহণক লৈ ভাবুকি দিয়াৰ অভিযোগ উঠা এজন মৌলৱীক লক্ষ্য কৰি কঠোৰ সকীয়নি দিছে মুখ্যমন্ত্ৰী পুষ্কৰ সিং ধামীয়ে। এনে ভাবুকিত চৰকাৰ ভয় নাখায় আৰু আইন ভংগ কৰা কোনো লোককে ৰেহাই দিয়া নহ’ব বুলি স্পষ্ট বাৰ্তা দিয়ে তেওঁ।
ধামীয়ে কয় যে এনে মন্তব্য বা ভাবুকিৰ আঁৰত কেৱল এজন ব্যক্তিৰ বক্তব্য নহয়, বৰং এক বিশেষ চিন্তা আৰু মতাদৰ্শ কাম কৰি থকা বুলি অভিযোগ উঠিছে। উত্তৰাখণ্ডক ‘দেৱভূমি’ বুলি উল্লেখ কৰি তেওঁ কয় যে ৰাজ্যখনত ভোটবেংকৰ ৰাজনীতি বা তুষ্টিকৰণৰ ভিত্তিত চৰকাৰ পৰিচালিত নহয়।
মুখ্যমন্ত্ৰীগৰাকীৰ ভাষণত ৰাজ্যখনত চলোৱা বেদখল উচ্ছেদ অভিযানৰ কথাও উল্লেখ কৰা হয়। তেওঁৰ দাবী অনুসৰি, উত্তৰাখণ্ডত ইতিমধ্যে প্ৰায় ১৩,০০০ একৰ ভূমিৰ পৰা অবৈধ দখল উচ্ছেদ কৰা হৈছে। এই অভিযান কোনো কাৰণতে বন্ধ নহ’ব বুলিও তেওঁ সকীয়াই দিয়ে।
ইয়াৰ লগতে ধামীয়ে উত্তৰাখণ্ডৰ কঠোৰ ভূমি আইন, অভিন্ন নাগৰিক সংহিতা (UCC) আৰু ধৰ্মান্তৰকৰণ ৰোধৰ বাবে প্ৰৱৰ্তিত আইনৰ কথাও উল্লেখ কৰে। সংবিধান আৰু ৰাজ্যৰ আইন-কানুন উলংঘা কৰা যিকোনো ব্যক্তিৰ বিৰুদ্ধে ব্যৱস্থা গ্ৰহণ কৰা হ’ব বুলি তেওঁ কয়।
খাটিমাত প্ৰলোভন দেখুৱাই ধৰ্মান্তৰিত কৰা বুলি অভিযোগ উঠা কিছুমান পৰিয়ালক পুনৰ নিজৰ পূৰ্বৰ ধৰ্মলৈ ঘূৰাই অনা হৈছে বুলিও ভাষণত দাবী কৰা হয়। অৱশ্যে এই দাবীসমূহৰ সমৰ্থনত উক্ত ভিডিঅ’টোত কোনো নথি বা বিস্তৃত তথ্য দিয়া হোৱা নাই।
ধামীয়ে লগতে সকীয়াই দিয়ে যে ৰাজ্যৰ যিকোনো প্ৰান্তত আইন-বিৰোধী কাৰ্যকলাপ বা এনে ধৰণৰ ভাবুকিৰ অভিযোগ পোৱা গ’লে চৰকাৰে বিষয়টো গুৰুত্বসহকাৰে ল’ব।
“কোনো মৌলৱী বা মোল্লাৰ কথাত ভয় খোৱাৰ প্ৰশ্নই নুঠে”— এই সুৰতে কঠোৰ বাৰ্তা দি তেওঁ কয় যে য’তেই এনে লোকৰ সন্ধান পোৱা যাব, আইন অনুসৰি তেওঁলোকৰ বিৰুদ্ধে ব্যৱস্থা গ্ৰহণ কৰা হ’ব।
