অৱশেষত ১৮ বছৰৰ বিফলতাৰ পাছত IPLৰ চেম্পিয়ন হ'ল ৰয়েল চেলেঞ্জাৰ্ছ বাংগালুৰু। অধিনায়ক ৰজট পাটিদাৰৰ ঐতিহাসিক নেতৃত্বত IPL চেম্পিয়ন হিচাপে স্বীকৃতি লাভ কৰিলে RCBয়ে। বহু বিশিষ্ট অধিনায়কে কৰিব নোৱাৰা এক কঠিন কাম এবাৰতে কৰি IPLৰ ইতিহাসত নিজৰ নাম লিপিবদ্ধ কৰিলে অধিনায়ক ৰজট পাটিদাৰে। ৰাহুল দ্ৰাবিড়, কেবিন পিটাৰছন, অনিল কুম্বলে, দেনিয়েল ভিটোৰী, বিৰাট কোহলী আৰু ফেফ ডুপ্লেছীৰ দৰে অধিনায়কে অপ্ৰাণ চেষ্টা কৰিও RCBক চেম্পিয়ন বনাবলৈ সক্ষম নহ'ল। কিন্তু প্ৰথমবাৰৰ বাবে অধিনায়কৰ দায়িত্ব লাভ কৰিয়েই RCBক চেম্পিয়ন বনাই দিলে ৰজট পাটিদাৰে। উল্লেখ্য যে, ৰজট পাটিদাৰ হৈছে মধ্য প্ৰদেশৰ এগৰাকী খেলুৱৈ। চৈয়দ মুস্তাক আলী ট্ৰফীত নিজ ৰাজ্যৰ দলক জয়ী কৰাবলৈ সক্ষম হোৱা নাছিল ৰজট পাটিদাৰ। একাংশৰ মন্তব্য কৰিছিল: ৰজট পাটিদাৰৰ নাই অধিনায়ক হোৱাৰ যোগ্যতা। মধ্য প্ৰদেশত বিফল হৈ পৰিছিল ৰজট পাটিদাৰ। কিন্তু ৰজট পাটিদাৰৰ সোণালী ইতিহাসৰ বাবে অপেক্ষা কৰি আছিল কৰ্ণাটকৰ এটা IPL দল। বিগত বৰ্ষত সৌভাগ্যক্ৰমে RCBৰ এগৰাকী আঘাতপ্ৰাপ্ত খেলুৱৈৰ স্থানত RCBৰ হৈ খেলিবলৈ সুবিধা পাইছিল ৰজটে। ২০২৪ চনত ৰজট পাটিদাৰৰ সুন্দৰ প্ৰদৰ্শন দেখি এইবাৰ RCBৰ অধিনায়কৰ দায়িত্ব প্ৰদান কৰা হৈছিল। বিৰাট কোহলীৰ দৰে তাৰকা খেলুৱৈ থকা দল এটাক নেতৃত্ব দিয়াটো ৰজটৰ বাবে সহজ নাছিল। সংবাদ মাধ্যম, সামাজিক মাধ্যম সকলোৰে দৃষ্টি আছিল কোহলীৰ ওপৰত। অধিনায়ক ৰজট পাটিদাৰক লৈ হোৱা নাছিল বিশেষ আলোচনা। পৰ্দাৰ পিছফালে থাকিয়েই কাম কৰি সফলতা লাভ কৰি দেখুৱালে ৰজটে। এতিয়া কেৱল কৰ্ণাটক নহয়, সমগ্ৰ দেশকে আনন্দিত কৰিছে ৰজট পাটিদাৰে।
