এক মৰ্মান্তিক ঘটনাই জোকাৰি গৈছে সমগ্ৰ ৰাজ্য। বন্ধু-বান্ধৱীৰ সৈতে শ্বিলঙলৈ ফুৰিবলৈ গৈ মৃত্যুক সাৱটিলে নুমলীগঁড়ৰ নম্ৰতা বৰাই। এই ঘটনাক লৈ ইতিমধ্যে বহু তথ্য পোহৰলৈ আহিছে। পোহৰলৈ আহিছে ৫ বন্ধু-বান্ধৱীয়ে মাজনিশা শ্বিলঙলৈ গৈ থকাৰ সেই দৃশ্য।
৩ জুনত নিশা ১.৩০ বজাত ফোন আহিছিল নম্ৰতালৈ। তাৰ পাছতে প্ৰজ্ঞা বৰা, মৃগাংক বৰুৱা, গায়ত্ৰী বৰুৱা আৰু আন্নায়াতুল ৱাদুদৰ সৈতে ওলাই গৈছিল নম্ৰতা।
কিন্তু মাজনিশা ১.৩০ বজাত কোনে শ্বিলঙলৈ লগ ধৰিছিল নম্ৰতাক? কোনে ফোন কৰিছিল নম্ৰতা বৰাক? জানিব পৰা মতে, নিশা প্ৰজ্ঞা আৰু মৃগাংকই মেঘালয়লৈ যাবলৈ লগ ধৰিছিল নম্ৰতা বৰাক।
বিধায়ক পুত্ৰ আন্নায়াতুল আৰু গায়ত্ৰীৰ বৰুৱাৰ সৈতে তাৰ পূৰ্বে পাৰ্টী কৰিছিল প্ৰজ্ঞা আৰু মৃগাংকই। আৰু তাৰ পিছত নম্ৰতাক মেঘালয়লৈ যাবলৈ লগ ধৰিছিল প্ৰজ্ঞা আৰু মৃগাংকই। কিন্তু ৪ তাৰিখে পুৱতিনিশা গুৱাহাটীলৈ ওভতাৰ পথত দুৰ্ঘটনাত পতিত হৈ নম্ৰতা মৃত্যু হোৱাৰ খবৰ লাভ কৰে পৰিয়ালে।
অভিযোগ অনুসৰি, দুৰ্ঘটনা সংঘটিত হোৱাৰ পিছতে আটাইকেইজন বন্ধুক এৰি আন্নায়াতুলে গাড়ী লৈ পলায়ন কৰে। তাৰ পিছত মৃগাংক বৰুৱা, প্ৰজ্ঞা বৰাই ৰাজপথেৰে চলাচল কৰা বাহন ৰখাই নম্ৰতাক নংপো অসামৰিক চিকিৎসালয়ত ভৰ্তি কৰাই। নংপো আৰক্ষীয়ে বিষয় সন্দৰ্ভত পলায়ন কৰা গাড়ীৰ গৰাকী আন্নায়াতুলক ফোন কৰি থানালৈ মাতে। তেতিয়াই আন্নায়াতুলে ইছমাইল হক চৌধুৰী নামৰ আন এজন ব্যক্তিয়ে বাহনখন চলোৱা বুলি নংপো আৰক্ষীৰ আগত হাজিৰ কৰোৱায়।
আলকাজাৰ বাহনখনে ৰখাই থোৱা ট্ৰাকত খুন্দা মৰা বুলি আৰক্ষীৰ আগত স্বীকাৰোক্তি দিয়ে। কিন্তু প্ৰকৃততে যদি ৰখাই থোৱা বাহনত খুন্দাই মাৰিছিল তেনেহলে বাহনখনৰ সন্মুখ ভাগ ডেমেজ হোৱাৰ কোনো চিন নাছিল। মাত্ৰ বাহনখনৰ বাওঁফালৰ দৰ্জাখন ভাগি যোৱাহে স্পষ্ট আছিল। যাকে লৈ এতিয়া সমগ্ৰ ঘটনাক লৈ সন্দেহ প্ৰকাশ কৰিছে নম্ৰতা বৰাৰ পৰিয়ালে।
আনহাতে নম্ৰতাৰ পৰিয়ালৰ অভিযোগ এইয়া এক পৰিকল্পিত হত্যাকাণ্ড।
