নম্ৰতাৰ মৃত্যুৰ পাছৰে পৰা বিধায়ক হাফিজ বছিৰ আহমেদ কাচিমীৰ ঘৰত ওলমিলে তলা

নম্ৰতা বৰা নিহত হোৱাৰ পাছৰে পৰা বিধায়ক হাফিজ বছিৰ আহমেদ কাচিমী ঘৰত ওলমি আছে তলা।বিধায়ক গৰাকীৰ বিলাসীপাৰাৰ বাসগৃহত কোনো লোক নথকাৰ পাছতেই পুত্ৰ আনায়াতুল বাডুদক লৈ চলিছে চৰ্চা।নম্ৰতাৰ মৃত্যুৰ পাছৰে পৰা বিধায়ক কাচিমীৰ পুত্ৰ আনায়াতুল বাডুদৰ পলাতক বুলিও চৰ্চা চলিছে। বিধায়ক হাফিজ বছিৰ আহমেদ কাচিমীৰ পুত্ৰ আনায়াতুল বাডুদ আছিল দুই সন্তানৰ পিতৃ। কিন্তু দুই সন্তানৰ পিতৃৰ সৈতে নম্ৰতা বৰাহঁতৰ বন্ধুত্বমূলক সম্পৰ্কক লৈও সৃষ্টি হৈছে বহু প্ৰশ্ন।

মেঘালয় নংপু আৰক্ষীয়ে ঘটনা সংক্ৰান্তত এতিয়াও সোধা পোছা কৰা নাই বিধায়ক গৰাকীৰ পুত্ৰক। শেহতীয়াকৈ ছ'চিয়েল মিডিয়াত ভাইৰেল হৈছে আনায়াতুল বাডুদৰ বাহনত নম্ৰতা বৰা আৰু তেওঁৰ বন্ধু-বান্ধৱী শ্বিলঙলৈ যোৱাৰ দৃশ্য। নম্ৰতা বৰাৰ মৃত্যুৰ পাছত শ্বিলঙৰ পৰা গুৱাহাটীলৈ উভতি অহা সময়ত আনায়াতুল বাডুদে গাড়ীত উঠাই আনিছিল তেওঁৰ গাড়ী চালকক। অভিযোগ অনুসৰি,ব্যক্তিগত গাড়ী চালকক ঘটনাৰ সৈতে জড়িত কৰিবলৈ অপচেষ্টা কৰিছে বিধায়ক গৰাকীৰ পুত্ৰই। মেঘালয়ত নম্ৰতা বৰাৰ মৃত্যুৰ ঘটনাক লৈ এতিয়াও সৃষ্টি হৈছে ৰহস্য।

নুমলীগড়ৰৰ নম্ৰতা বৰাৰ মৃত্যুৰ পাছতেই পোহৰলৈ আহিছে চাঞ্চল্যকৰ তথ্য। ৪ জুনত মেঘালয়ৰ ৰিভয় জিলাৰ চাংৱাংলাত এক পথ দুৰ্ঘটনা মৃত্যু হৈছিল নম্ৰতা বৰাৰ। মেঘালয়ত মৃত্যু হোৱা নম্ৰতা বৰাৰ সৈতে আছিল এগৰাকী AIUDF বিধায়কৰ পুত্ৰ আনায়াতুল বাডুদ। AIUDF ৰ বিধায়কৰ পুত্ৰ আনায়াতুল বাডুদৰ বিলাসী বাহনত উঠি শ্বিলঙলৈ গৈছিল আইনৰ ছাত্ৰী নম্ৰতা বৰা। আনায়াতুল বাডুদৰ লগতে নম্ৰতাৰ সৈতে শ্বিলঙলৈ গৈছিল গায়ত্ৰী বৰা আৰু মহম্মদ ইছমাইল হক চৌধৰী, প্ৰজ্ঞা দিহিঙীয়া, মৃগাংক বৰা। পুৱতি নিশা শ্বিলঙৰ পৰা উভতি অহাৰ সময়ত এখন ট্ৰাকত খুন্দা মৰাৰ ফলত গুৰুতৰভাবে আঘাতপ্ৰাপ্ত হৈছিল নম্ৰতা বৰা।

অভিযোগ অনুসৰি, শ্বিলঙত দুৰ্ঘটনা সংঘটিত হোৱাৰ  পাছতেই ঘটনাস্থলীৰ পৰা পলায়ণ কৰিছিল আনায়াতুল বাডুদ আৰু গায়ত্ৰী বৰাই। দুৰ্ঘটনাত মৃত্যু হোৱা নম্ৰতা বৰাক হাস্পতাললৈ লৈ গৈছিল মৃগাংক বৰুৱা আকু প্ৰজ্ঞা দিহিঙীয়াই। কিন্তু নম্ৰতাৰ দুৰ্ঘটনাত পতিত হোৱাৰ পাছত কিয় ঘটনাস্থলীৰ পৰা পলায়ন কৰিছিল আনায়াতুল ৱাড়ুদ,মহম্মদ ইছমাইল হক চৌধুৰী আৰু গায়ত্ৰী বৰাই।শুকুৰবাৰে নম্ৰতা বৰাৰ পৰিয়ালৰ গোচৰৰ ভিত্তিত নংপু থানাৰ আৰক্ষীয়ে সোধা পোছা কৰিব নম্ৰতাৰ সৈতে শ্বিলঙলৈ যোৱা তিনি সতীৰ্থক।