জাগীৰোডৰ চেমী ক'ণ্ডাক্টৰ প্ৰকল্পত চাকৰি দিয়াৰ নামত ধন সংগ্ৰহ কৰা প্ৰবঞ্চক আটক । প্ৰকল্প আৰম্ভ নোহোৱাৰ আগতেই চাকৰি দিয়াৰ নামত ধন সংগ্ৰহত নামিছে একাংশ প্ৰৱঞ্চক। জাগীৰোডত নিৰ্মীয়মাণ টাটাৰ ছেমিকণ্ডাক্টৰ প্ৰকল্পত চাকৰি দিয়াৰ নামত গা কৰি উঠিছে এটা বৃহৎ চক্ৰই বুলি অভিযোগ ৷ নগাঁও আৰু মৰিগাঁও জিলা সামৰি চাকৰিৰ নামত বৃহৎ পৰিমানৰ ধন আত্মসাত কৰাত উঠিপৰি লাগিছে এই দুষ্টচক্ৰটোৱে ৷
হোৱাটচএপ গ্ৰুপ খুলি নিবনুৱা যুৱক-যুৱতীক টাটা ছেমিকণ্ডাক্টৰ প্ৰকল্পত লোভনীয় চাকৰি দিয়াৰ নামত অপপ্ৰচাৰ চলাই ধন লুটাৰে এওঁলোকৰ লক্ষ্য এতিয়া।
প্ৰকল্পটোৰ এটা চাকৰি দিয়াৰ নামত লক্ষাধিক ধন সংগ্ৰহৰ জাল পেলাইছে প্ৰৱঞ্চকে ৷ প্ৰায় দুশ গৰাকী নিবনুৱা যুৱক-যুৱতীৰ পৰা চক্ৰটোৱে প্ৰৱঞ্চনাৰে বৃহৎ পৰিমানৰ ধন লুটাৰো অভিযোগ।এই চক্ৰটোৰ নেতৃত্বত এগৰাকী অধ্যাপকো জড়িত থকাৰ অভিযোগ। নগাঁও জিলাৰ কাৱৈমাৰীৰ জনৈক চাইকুল ইছলাম নামৰ অধ্যাপক গৰাকীৰ একাউন্টত ইতিমধ্যে বৃহৎ ধনৰাশি জমা হোৱাৰ অভিযোগ।
ইয়াৰোপৰি জাগীৰোডৰ নেলীৰ তাৰিকুল্লা আহমেদ নামৰ প্ৰৱঞ্চকটোৱে নিজকে টাটাৰ অভিযন্তা বুলি চিনাকি দি চলাই গৈছিল চাকৰি দিয়াৰ ভুৱা নাটক ৷ ইয়াৰ সৈতে জড়িত আছিল ৰূপহীহাটৰ তুফেইল আহমেদ আৰু চাকিল জুনাইদ নামৰ দুই প্ৰৱঞ্চক ৷এক অভিযোগৰ ভিত্তিত মৰিগাঁও আৰক্ষীয়ে অধ্যাপক চাইকুল ইছলাম, তুফেইল আহমেদ আৰু চাকিল জুনাইদক গ্ৰেপ্তাৰ কৰাৰ লগতে শ্বিলঙৰ ডাউকীত আত্মগোপন কৰি থকা মাষ্টাৰমাইণ্ড নেলীৰ তাৰিকুল্লা আহমেও আত্মসমৰ্পণ কৰে জাগীৰোড আৰক্ষী থানাত ৷
প্ৰৱঞ্চক কেইটাৰ পৰা আৰক্ষীয়ে উদ্ধাৰ কৰে টাটা ছেমিকণ্ডাক্টৰ প্ৰকল্পৰ বিভিন্ন বিভাগৰ ভুৱা নিযুক্তি পত্ৰ, সাক্ষাৎকাৰ পত্ৰ আৰু বহু ভুৱা নথিপত্ৰ ৷ পৱিত্ৰ ঈদৰ দিনাই নামাজ আদায় কৰাৰ পৰিৱৰ্তে ৰঙাঘৰৰ আলহী হ’ল চাৰি অভিযুক্ত ৷ আনহাতে টাটা ছেমিকণ্ডাক্টৰ প্ৰকল্পত চাকৰিৰ নামত এনে প্ৰৱঞ্চকৰ জালত ভৰি নিদিবলৈ সকলোকে আহ্বান জনাইছে মৰিগাঁও আৰক্ষী প্ৰশাসনে ৷।
