নিশা বিচনাত পৰোতেই বিকট শব্দ! কিহৰ শব্দ উৱাদিহ নাপাওঁতেই ভয়ংকৰ কাণ্ড

সময় তেতিয়া নিশা প্ৰায় ১১:৩০ বাজিছিল। নিশাৰ আহাৰ গ্ৰহণ কৰি শোৱাপাটীত পৰাৰ সময় হৈছিল তেতিয়া। মহানগৰীৰ ৰূপনগৰত সেই সময়তে শুনা গৈছিল এটা প্ৰচণ্ড শব্দ। শব্দৰ উৎস বিচাৰি উৱাদিহ উলিওৱাৰ পূৰ্বেই স্থানীয় দুটা পৰিয়ালৰ বাসগৃহৰ ওপৰত বাগৰি পৰি এটা দৈত্যকায় শিল।নিমিষতে তচনচ হৈ গ'ল বিনয় সিং আৰু ৰেণু বৰ্মনৰ বাসগৃহ দুটা। শব্দ শুনি চাবলৈ ওলোৱা মনেশ্বৰ ৰাজবংশী সোমাই পৰিল শিলৰ তলত। ভয়ংকৰ ভূমিস্খলনে সৰ্বহাৰা কৰা ৰেণু বৰ্মনৰ তোলনীয়া পুত্ৰ মনেশ্বৰ ৰাজবংশীৰ নোলাল সন্ধান। শুকুৰবাৰৰ নিশাৰ ভয়ংকৰ ঘটনা।

নিশাৰে পৰাই SDRF আৰু আৰক্ষীৰ দলে ঘটনাস্থলীত অব্যাহত ৰাখিছে উদ্ধাৰ অভিযান। ১০/১২ ফুট ওপৰৰ পৰা দুটাকৈ ঘৰৰ মুধচত বাগৰি হেঁচি ধৰা বৃহদাকায় শিল ভাঙিবলৈ ব্যৱহাৰ কৰিব লগা হয় ড্ৰিলিং মেচিন।কাৰন ঘটনা সংঘটিত হোৱা স্থানলৈ এক্সকেভেটৰ সোমোৱাৰ কোনো পথ নাই।এক অৱৰ্ণনীয় পৰিৱেশৰ মাজত কালি নিশাৰ পৰা আজি ওৰেটো দিন এনেদৰেই চলি থাকিল উদ্ধাৰ অভিযান। 

ইফালে ৰূপনগৰৰ এই ভয়ংকৰ ভূমিস্খলনৰ ঘটনাৰ পাছতে সমীপৰ ১২টাকৈ ঘৰ খালী কৰাৰ নিৰ্দেশণা জাৰি কৰিছে কামৰূপ মহানগৰ প্ৰশাসনে।অতি শীঘ্ৰেই সংশ্লিষ্ট পৰিয়ালসমূহক নিৰাপদ স্থানলৈ যোৱাৰ নিৰ্দেশ দিয়া হৈছে।বাৰিষা এই পৰিয়ালসমূহৰ আশ্ৰয়ৰ বাবে প্ৰশাসনে ব্যৱস্থা কৰিছে কমিউনিটী হলৰ।জানিব পৰা মতে ভূমিস্খলনৰ কবলত পৰা অঞ্চলটোত পূৰ্বেও মাইকযোগে স্থানীয় লোকক সুৰক্ষিত স্থানলৈ যোৱাৰ পৰামৰ্শৰে সতৰ্কবাণী শুনাইছিল গাওঁপ্ৰধানে।।