মাকুমৰ ৰেলৱে জংচনত সমীপত অচিনাক্ত মৃত দেহ উদ্ধাৰ

মাকুমৰ ৰেলৱে জংচনত সমীপত অচিনাক্ত মৃত দেহ উদ্ধাৰ। এটা পৰিত্যক্ত আবাসত ৩৫ বছৰীয়া যুৱকৰ মৃতদেহ উদ্ধাৰকলৈ চাঞ্চল্য। স্থানীয় ৰাইজৰ অভিযোগ সন্ধ্যা হ'লেই অঞ্চলটোত চলে নিচাজাতীয় দ্ৰব্যৰ বেহা।  

মাকুম ৰেলৱে জংচনৰ পৰিত্যক্ত অৱস্থাত থকা ৰেলৱে আবাসত পুনৰ অচিনাক্ত মৃত দেহ উদ্ধাৰ।মৃত্যুৰ উপত্যকালৈ পৰিণত হৈছে মাকুম ৰেলৱে জংচনৰ পৰিত্যক্ত অৱস্থাত থকা ৰেলৱে আবাস সমূহ।

শনিবাৰে পুনৰ দিনৰ ভাগত মাকুম ৰেলৱে জংচনৰ পৰিত্যক্ত অৱস্থাত থকা ৰেলৱে আবাসত অচিনাক্ত মৃত দেহ উদ্ধাৰ হয় । উদ্ধাৰ হোৱা অচিনাক্ত মৃতদেহটো এজন যুৱকৰ আনুমানিক বয়স ৩৫ বছৰ। যুৱক জনৰ মৃত্যুৰ কাৰণ বর্তমানলৈ জানিব পৰা হোৱা নাই যদিও মৰণোত্তৰ পৰীক্ষাৰ পাছত মৃত্যুৰ কাৰণ জানিব পৰা যাব। পৰৱৰ্তী পৰ্যায়ত ঘটনা স্থলীত ৰেলৱে আৰক্ষী আৰু মাকুম থানাৰ আৰক্ষী উপস্থিত হৈ ঘটনাস্থলী নিৰীক্ষণ কৰি তিনিচুকীয়া কাৰ্যবাহী দণ্ডাধীশ ৰুণজুন বৰাৰ উপস্থিতিত মৃতদেহটো মৰণোত্তৰ পৰীক্ষাৰ বাবে লৈ যায়। 

উল্লেখযোগ্য বিষয় যে বিগত ছমাহত  উক্ত মাকুম ৰেলৱে জংচনৰ পৰিত্যক্ত অৱস্থাত থকা আবাসসমূহত তিনিটাকৈ মৃত দেহ এনেদৰে উদ্ধাৰ হৈছিল। ইয়াৰ আঁৰৰ ঘটনা আজি পৰ্যন্ত জানিব পৰা নগ'ল। স্থানীয় লোকৰ মতে, সন্ধ্যা হ'লেই এইটো অঞ্চলত চলে নিচাজাতীয় দ্ৰব্যৰ আড্ডা। বিশৃংখল যুৱকৰ বাইকৰ অতপালি। ৰেলৱে আৰক্ষী হওঁক বা স্থানীয় আৰক্ষীৰ এই সমূহ কাণ্ড চকুত নপৰা বিষয়টোৱে সচেতন মহলৰ মাজত বিভিন্ন প্রশ্ন উত্থাপিত কৰিছে।