মেঘালয়ৰ 'হানীমুন মাৰ্ডাৰ'ক লৈ দেশজুৰি জোকাৰণি। স্বামী ৰাজাৰ হত্যাত জড়িত ৩ অভিযুক্তক গ্ৰেপ্তাৰ। সোনম ৰঘুবংশীয়েই হত্যা কৰোৱাইছিল স্বামী ৰাজা ৰঘুবংশীক। ৰহস্য উদ্ঘাটনৰ পাছতেই কঁপিছে সভ্য সমাজ। 'হানীমুন'লৈ আহি 'চুপাৰি কিলাৰ'ৰ হতুৱাই স্বামী হত্যাৰ জঘন্য কাণ্ড! আৰক্ষীৰ তদন্তই বদনামী হোৱাৰ পৰা বচালে প্ৰকৃতিৰ ৰম্যভূমিক।

অৱশেষত অৱসান ১৭ দিনীয়া শ্বাসৰুদ্ধকৰ উৎকন্ঠাৰ। ৰহস্য পোহৰলৈ অহাৰ পাছতেই মানৱ সভ্যতাত জোঁকাৰণি। এটা অভাৱনীয় ঘটনাই কঁপাই গ'ল প্ৰকৃতিৰ ৰম্যভূমি মেঘালয়ক। কোনে বাৰু কল্পনা কৰিব পাৰে কোনো নৱবিৱাহিত দম্পতীয়ে চেৰাপুঞ্জীৰ প্ৰাকৃতিক পৰিৱেশত মধুচন্দ্ৰিকা যাপনৰ বাবে গৈ ইমান জঘন্য দৃষ্টান্ত ৰচিব? বিয়াৰ এসপ্তাহতে হানীমুনলৈ যোৱা পত্নীয়ে চুপাৰি কিলাৰ লগাই নিজ স্বামীক হত্যা কৰিব পাৰে বুলি সভ্য সমাজে কল্পনাও কৰিব পাৰেনে? কিন্তু উত্তৰ প্ৰদেশৰ গাজীপুৰৰ পৰা স্বামী হত্যাৰ অভিযোগত আৰক্ষীয়ে গ্ৰেপ্তাৰ কৰা সোনম ৰঘুবংশীয়ে যেন সলাই পেলালে ন-কইনাৰ ধাৰণা। স্বামী ৰাজা ৰঘুবংশীৰ সৈতে চেৰাপুঞ্জীলৈ হানীমুনলৈ গৈ যোৱা ২৩ মে'ৰ পৰা সন্ধানহীন হৈ আছিল সোনম। আৰক্ষীৰ তদন্তৰ মাজতে ২ জুনত উদ্ধাৰ হৈছিল স্বামী ৰাজা ৰঘুবংশীৰ অৰ্ধগলিত মৃতদেহ। সন্দেহ কৰা হৈছিল দুৰ্বৃত্তই সোনমক বাংলাদেশৰ দিশে পলুৱাই নিয়া বুলি। কিন্তু ৰাজা-সোনমৰ অন্তিম অৱস্থান ধৰা পৰা CCTV ফুটেজত সোনমৰ গতিবিধিয়ে সন্দিহান কৰি তুলিছিল আৰক্ষীক। অৱশেষত উত্তৰ প্ৰদেশৰ গাজীপুৰ জিলাত নন্দগঞ্জ থানা এলেকাৰ এখন ধাবাৰ পৰা উদ্ধাৰ কৰা হয় ১৭ দিনে নিৰুদ্দিষ্ট সোনম ৰঘুবংশীক। নিশাই ৰাজাৰ হত্যাকাণ্ডৰে জড়িত এজন লোকক উত্তৰ প্ৰদেশৰ পৰা আৰু আন দুজনক মধ্য প্ৰদেশৰ ইন্দোৰৰ পৰা আটক কৰে আৰক্ষীয়ে।আন এজনৰ সন্ধানত এতিয়াও অব্যাহত আছে আৰক্ষীৰ অভিযান। প্ৰাৰম্ভিক অৱস্থাত পৰকীয়া প্ৰেমৰ বাবেই ৰাজা ৰঘুবংশীক দুই 'চুপাৰি কিলাৰ'ৰ হতুৱাই হত্যা কৰা বুলি সন্দেহ কৰা হৈছে। জানিব পৰা মতে ৰাজ কুছৱাহা নামৰ এজনৰ সৈতে প্ৰেমৰ সম্পৰ্ক আছিল সোনমৰ। ইফাল নিজৰ কন্যাই এনে কাম কৰিবই নোৱাৰে বুলি দৃঢ়মত প্ৰকাশ কৰি সোনমৰ পিতৃ-মাতৃয়ে ঘটনাক লৈ মেঘালয় আৰক্ষীয়ে মিথ্যাচাৰৰ আশ্ৰয় লোৱাৰ অভিযোগ তুলিছে। দাবী কৰিছে ঘটনাৰ CBI তদন্ত। 

ইফালে ৰাজা ৰঘুবংশীৰ ভাতৃ বিপুল ৰঘুবংশীয়ে জনোৱা মতে নৱবিৱাহিত দম্পতীয়ে কামাখ্যাৰ আশীৰ্বাদ ল'বলৈ গৈ কি পৰিস্থিতিত চেৰাপুঞ্জীলৈ যোৱাৰ পৰিকল্পনা কৰিলে, সেই সন্দৰ্ভতো জ্ঞাত নহয় পৰিয়ালৰ লোক। সোনমক অভিযুক্তহে কৰা হৈছে, কিন্তু দোষী হয় নে নহয় সেই বিষয়ত এতিয়াই মন্তব্য প্ৰকাশ কৰিব নুখুজিলে ৰাজাৰ ভাতৃয়ে।

ইফালে তদন্তৰ তৎপৰতাৰে ঘটনাৰ ৰহস্য উদ্ঘাটন কৰি নিজ ৰাজ্যক বদনামৰ পৰা বছোৱা মেঘালয় আৰক্ষীৰ শলাগ লৈছে ৰাজ্যখনৰ মুখ্যমন্ত্ৰী কনৰাড চাংমাই। অচিৰেই স্বামী হত্যাৰ অভিযোগত গ্ৰেপ্তাৰ কৰা সোনমক নিজৰ জিম্মাত লৈ সমগ্ৰ ঘটনাৰ পৰৱৰ্তী তদন্ত প্ৰক্ৰিয়া সম্পন্ন কৰিব মেঘালয় আৰক্ষীয়ে।।