প্ৰাক্তন মুখ্যমন্ত্ৰী সৰ্বানন্দ সোণোৱালক ৰাজ্যৰ ৰাজনীতিত সংস্থাপিত কৰাৰ পৰিকল্পনাত ব্ৰতী হৈছে নেকি বিজেপিৰ হাইকামাণ্ড। গৌৰৱ গগৈৰ লগতে বিধানসভাৰ এদিনীয়া বিশেষ অধিৱেশনত দেখা গ'ল প্ৰাক্তন মুখ্যমন্ত্ৰী সৰ্বানন্দ সোণোৱালক। গেলেৰীত বহি সদনৰ কাৰ্যক্ৰমনিকা প্ৰত্যক্ষ কৰিলে কেন্দ্ৰীয় মন্ত্ৰী সৰ্বানন্দ সোণোৱালে। গৌৰৱ গগৈয়ে প্ৰদেশ কংগ্ৰেছৰ সভাপতিৰ দায়িত্ব লোৱাৰ পাছতেই বিজেপিৰ হাইকামাণ্ডে অসমৰ ৰাজনীতিত সক্ৰিয় কৰিব বিচাৰিছে নেকি সোণোৱালক ?
সোমবাৰে বিধানসভাৰ বিশেষ অধিৱেশনত প্ৰাক্তন মুখ্যমন্ত্ৰী গৰাকীৰ উপস্থিতিয়ে কিহৰ ইংগিত দিলে বুলিও চৰ্চা চলিছে । ২৬ ৰ বিধানসভা নিৰ্বাচনত মুখ্যমন্ত্ৰী হিমন্ত বিশ্ব শৰ্মাৰ নেতৃত্বতে নিৰ্বাচনত অৱৰ্তীণ হ'ব বিচৰা নাই নেকি দলটোৰ হাইকামাণ্ডে ?
গৌৰৱ গগৈক প্ৰদেশ কংগ্ৰেছৰ সভাপতিৰ দায়িত্ব দি গান্ধী পৰিয়ালে খেলিব বিচাৰিছে 'আহোম কাৰ্ড'। প্ৰদেশ কংগ্ৰেছৰ এই ৰণনীতিক প্ৰত্যাহ্বান জনাবলৈ জনজাতীয় নেতা সৰ্বানন্দ সোণোৱালক ৰাজ্যত সক্ৰিয় কৰিছে নেকি বিজেপিৰ হাইকামাণ্ডে ?
জনজাতীয় নেতা হোৱাৰ লগতে প্ৰাক্তন মুখ্যমন্ত্ৰী হিচাপে অসমবাসীৰ মনত এক নিগাজী আসন আছে সৰ্বানন্দৰ। ২৬ ৰ বিধানসভা নিৰ্বাচনত পৰিস্থিতি বিজেপিৰ অনুকূল নহ'লে ৰাজ্যৰ ৰাজনীতিত গুৰুত্ব বাঢ়িব পাৰে সোণোৱালৰ। ২০১৬ চনৰ বিধানসভা নিৰ্বাচনত সোণোৱালৰ নেতৃত্বতে উজনিৰ ৰাজনীতিত প্ৰভাৱ বিস্তাৰ কৰিবলৈ সক্ষম হৈছিল বিজেপি।
উজনিৰ ৰাজনীতিত 'তিনি গগৈ'ৰ মিত্ৰতা প্ৰসংগই যদি বিশেষ গুৰুত্ব লাভ কৰে তেন্তে বিজেপিৰ শেষ পাট অস্ত্ৰ হ'ব পাৰে সৰ্বানন্দ সোণোৱাল। গতিকে সোমবাৰে বিধানসভাৰ সেই পুৰণি স্মৃতি সোৱৰি ৰাজ্যৰ ৰাজনীতিলৈ প্ৰত্যাৱৰ্তনৰ ইংগিত দিলে নেকি সোণোৱালে ?
