বিধানসভাৰ বিশেষ অধিৱেশনত উপস্থিত থাকি চৰম অস্বস্তিত পৰিল প্ৰদেশ কংগ্ৰেছৰ সভাপতি গৌৰৱ গগৈ।
বিধানসভাৰ বিশেষ অধিৱেশনত গৌৰৱ গগৈক সমুখৰ পৰা সমালোচনা কৰাৰ সুবৰ্ণ সুযোগ পালে মুখ্যমন্ত্ৰীয়ে।
সোমবাৰে বিধানসভাৰ বিশেষ অধিৱেশনত মুখ্যমন্ত্ৰী হিমন্ত বিশ্ব শৰ্মাৰ টাৰ্গেট হৈ পৰিল গৌৰৱ গগৈ। বিধানসভাত উপস্থিত হৈ মুখ্যমন্ত্ৰীয়ে নাগৰিকত্বৰ প্ৰসংগত কৰা সমালোচনা নীৰৱ দৰ্শক হৈ শুনি থাকিল গৌৰৱ গগৈয়ে।
এটা পৰিয়ালৰ ৪ জন সদস্যৰ ৩ জনেই নিজৰ নাগৰিকত্ব এৰি দিছে বুলি বিধানসভাত গৌৰৱ গগৈক কটাক্ষ মুখ্যমন্ত্ৰীৰ। বিধানসভাৰ মজিয়াত গৌৰৱ গগৈৰ নাম উচ্চাৰণ নকৰাকৈ তেওঁৰ পত্নী আৰু দুই সন্তানৰ নাগৰিকত্বৰ ওপৰত প্ৰশ্ন কৰিলে মুখ্যমন্ত্ৰীয়ে।সদনৰ গলেৰীত মুখ্যমন্ত্ৰীয়ে কৰা সমালোচনা নীৰৱে সহি থকাৰ বাহিৰে যেন আৰু কোনো উপায় নাছিল গৌৰৱ গগৈৰ। কংগ্ৰেছৰ বাবে নিজৰ নাগৰিকত্ব বেছি মূল্যৱান নহয় বাবে নাগৰিকত্ব এৰি দিছে বুলি গৌৰৱ গগৈক আক্ৰমণৰ লক্ষ্য কৰি ললে মুখ্যমন্ত্ৰীয়ে।
উল্লেখযোগ্য যে,সোমবাৰে অনুষ্ঠিত বিধানসভাৰ এদিনীয়া বিশেষ অধিৱেশন প্ৰত্যক্ষ কৰিবলৈ বিধানসভাৰ গেলেৰীৰ পাছ সংগ্ৰহ কৰিছিল গৌৰৱ গগৈয়ে। বিধানসভাৰ অধিৱেশনত গৌৰৱ গগৈ উপস্থিত হোৱাৰ পাছতেই তেওঁৰ পৰিয়ালৰ সদস্যৰ নাগৰিকত্বক লৈ সদনত সৰৱ হ'ল মুখ্যমন্ত্ৰী। অৱশ্যে মুখ্যমন্ত্ৰীয়ে উত্থাপন কৰা গৌৰৱ গগৈৰ নাগৰিকত্বৰ বিষয়টো সদনত আলোচনা নকৰিবলৈ দাবী জনাইছিল বিৰোধী দলৰ দলপতি দেব্ৰৱত শইকীয়াই। গৌৰৱ গগৈ যিহেতু বিধানসভাৰ সদস্য নহয় সেইবাবে মুখ্যমন্ত্ৰীয়ে বিষয়টো সদনত উত্থাপন কৰা অনুচিত বুলি দাবী কৰিছিল দেব্ৰৱত শইকীয়াই।
সদনত বাংলাদেশী অনুপ্ৰৱেশকাৰীৰ বিতাড়ণৰ বিষয়টোৰ সন্দৰ্ভত মন্তব্য ৰাখিবলৈ গৈ গৌৰৱ গগৈৰ পৰিয়ালক টাৰ্গেট কৰি লৈছিল মুখ্যমন্ত্ৰীয়ে।
