'ৰাজা মৰি গ'লে তোমাৰ লগত বিয়া দিয়াত আপত্তি নাথাকিব মোৰ পৰিয়ালৰ, প্ৰেমিক ৰাজক আশ্বাস দিছিল সোনমে! দেউতা হৃদৰোগী, ঘৰৰ মতত বিয়া নাপাতিলে অঘটন ঘটিব!'
কাল্পনিক কথোপকথন যদিও ঠিক এনেকৈয়েই প্ৰেমিক ৰাজক আশ্বাস দিছিল সোনমে
দেশ জোকাৰি যোৱা চেৰাপুঞ্জীৰ 'হানীমুন মাৰ্ডাৰ'ক লৈ পোহৰলৈ আহিব ধৰিছে ইটোৰ পিছত সিটো চাঞ্চল্যকৰ তথ্য।
ইতিমধ্যে উত্তৰ প্ৰদেশত গ্ৰেপ্তাৰ হোৱা সোনম ৰঘুবংশীসহ ৪ অভিযুক্তক ৭ দিনৰ ট্ৰেনজিত ৰিমাণ্ডত লৈছে মেঘালয় আৰক্ষীয়ে। ৰাজা ৰঘুবংশী হত্যাকাণ্ডৰ মূল অভিযুক্ত সোনমৰ প্ৰেমিক ৰাজ কুছৱাহাৰ লগতে ছুপাৰী কিলাৰ বিশাল চৌহান, আকাশ ৰাজপুত আৰু আনন্দ কুৰ্মীক ট্ৰেনজিত ৰিমাণ্ডত লৈ শ্বিলঙত 'ক্ৰাইম চিন ৰিক্ৰিয়েচন'ৰ তৎপৰতা মেঘালয় আৰক্ষীৰ। ইতিমধ্যে ঘটনা সন্দৰ্ভত যি তথ্য প্ৰকাশ পোৱা বুলি চৰ্চিত হৈছে, সেই শিহৰণকাৰী বৰ্ণনা শুনি স্তম্ভিত হৈ পৰিছে সভ্য সমাজ। জানিব পৰা মতে সোনমে পিতৃ হৃদৰোগী হোৱাৰ বাবেই ৰাজা ৰঘুবংশীৰ সৈতে ঘৰে ঠিক কৰা বিয়াখনৰ বিৰুদ্ধাচৰণ কৰা নাছিল অঘটনৰ আশংকাত। কিন্তু পৰিকল্পনা কৰি পেলাইছিল তাইতকৈ ৫ বছৰৰ সৰু ৰাজ কুছৱাহাকে জীৱনসংগী কৰাৰ। পিতৃৰ ফেক্টৰীৰ কৰ্মচাৰী ৰাজৰ সৈতে সোনমৰ প্ৰেমৰ সম্পৰ্ক ৪/৫ বছৰ পুৰণি।সেয়ে ৰাজক এক অদ্ভুত চৰ্ত দিহে ঘৰৰ কথা নেপেলাই ৰাজা ৰঘুবংশীৰ সৈতে বিয়াত বহিছিল সোনম। তাইৰ ধাৰণা আছিল বিয়া পাতি বিধৱা হৈ ল'লে প্ৰেমিক ৰাজৰ সৈতে বিয়া দিয়াত পৰিয়ালৰ আপত্তি নাথাকিব।
ভবা মতেই প্ৰস্তুত কৰা হৈছিল পৰিকল্পনা।মধুচন্দ্ৰিকাতে স্বামী ৰাজা ৰঘুবংশীক শেষ কৰি দিয়াৰ পৰিকল্পনা কৰা হৈছিল।হানীমুনত আহি গুৱাহাটীত উপস্থিত হৈয়েই শ্বিলঙত ডেলিভাৰীৰ বাবে তায়েই অনলাইনত অৰ্ডাৰ দিছিল ধৰাল দা। চেৰাপুঞ্জীলৈ গৈ সোনম-ৰাজাই বাহৰ পতা হোমষ্টে'ৰ এক কিলোমিটাৰ দূৰত্বৰ হোটেলত আছিল হত্যাকাৰীৰ দল। সোনমে প্ৰেমিক ৰাজক দিছিল লোকেচন। ছুপাৰী কিলাৰক চুক্তিমতেই আদায় দিয়া হৈছিল ৫০ হাজাৰ টকা। তাৰ পৰৱৰ্তীসময়ত পৰিকল্পনামতেই নিৰ্দিষ্ট স্থানত প্ৰথমে পিছফালৰ পৰা আক্ৰমণ কৰি ৰাজা ৰঘুবংশীৰ ওপৰত জপিয়াই পৰিছিল হত্যাকাৰীৰ দল। উপৰ্যুপৰি আক্ৰমণৰ সময়ত সোনমে ৰাজাক হত্যাৰ বাবে চিঞৰি চিঞৰি নিৰ্দেশ দিছিল আক্ৰমণকাৰীক। ইমানৰ পাছতো উশাহ লৈ থকা ৰাজাক সোনমেই দ খাৱৈলৈ গতিয়াই শেষ কৰি পেলাইছিল স্বামীৰ জীৱন। কিন্তু ইমানতে বাটৰ হেঙাৰ আঁতৰি গ'ল বুলি উল্লাস কৰা হত্যাকাৰীহঁতৰ অভিসন্ধি ভবামতেই পূৰণ নহ'ল। পাছৰ পৰ্যায় এতিয়া সকলোৰে চকুৰ সন্মুখত। লক্ষণীয়ভাৱে ভয়ংকৰ পৰিকল্পনাৰ ওপৰত সন্দেহ উপজিব নোৱাৰাকৈ ৰাজা ৰঘুবংশীৰ অন্তেষ্টিক্ৰিয়াতো বিষাদগ্ৰস্ততাৰ অভিনয়েৰে ভাগ লোৱা দেখা গৈছিল মূল অভিযুক্ত সোনমৰ প্ৰেমিক ৰাজ কুছৱাহাক।
এই পৰ্যন্ত ইমানখিনিয়েই তথ্য পোহৰলৈ অহা বুলি সৰ্বত্ৰে চৰ্চিত হৈছে। মেঘালয়ত 'ক্ৰাইম চিন ৰিক্ৰিয়েচন'ৰ পাছত পোহৰলৈ আহিব অধিক তথ্য। মানৱতাক জোকাৰি যোৱা জঘন্য ঘটনাৰ সবিশেষ ৰহস্য উদ্ঘাটনৰ বাবে বাট চাব লাগিব আৰক্ষীৰ তদন্ত প্ৰক্ৰিয়াৰ সমাপ্তিলৈ।।
