বকৰী ঈদৰ কোৰবানীক লৈ গৰম হৈছে ত্ৰিপুৰাৰ ৰাজনীতি। ঈদ-উল-আজহাৰত এটা মুছলমান পৰিয়ালক কুৰবানী দিবলৈ গোধন উপহাৰ দিয়াৰ অভিযোগ উঠিছে মুখ্যমন্ত্ৰী মানিক সাহাৰ বিৰুদ্ধে। ত্ৰিপুৰাৰ মুখ্যমন্ত্ৰীৰ নিৰ্দেশত মুছলমান পৰিয়ালটোক কুৰবানীৰ বাবে গৰু উপহাৰ দিছিল বিল্লাই মিঞাই! বিল্লাই মিঞাই মুছলমান পৰিয়ালটোক কুৰবানীৰ বাবে গৰু উপহাৰ দিয়াৰ ভিডিঅ' ভাইৰেল হৈছিল ছ'চিয়েল মিডিয়াত। ত্ৰিপুৰা প্ৰদেশ কংগ্ৰেছ কমিটিৰ ফেচবুক পেজত সেই ভিডিঅ' আপলোড কৰাক লৈ সৃষ্টি হৈছিল বিতৰ্ক। মুখ্যমন্ত্ৰী মানিক সাহাৰ নিৰ্দেশত মুছলমানক গৰু উপহাৰ দিয়া বিল্লাল মিঞা হৈছে ত্ৰিপুৰা বিজেপিৰ সংখ্যালঘু মৰ্চাৰ ৰাজ্যিক সভাপতি।
অভিযোগ অনুসৰি,ত্ৰিপুৰাৰ উদয়পুৰৰ ৰাজনগৰ অঞ্চলত জমিয়ত উলেমা হিন্দৰ সদস্যৰ উপস্থিতি বিল্লালে মুছলমান পৰিয়ালটোক উপহাৰ দিছিল গৰু। ত্ৰিপুৰা কংগ্ৰেছৰ অভিযোগ অনুসৰি, ৭ জুনত বিল্লাল মিঞাই নিজেই উপস্থিত হৈ কুৰবানীৰ বাবে গৰু দান কৰাৰ কথা উল্লেখ কৰিছিল।
অৱশ্যে উত্থাপিত অভিযোগ খণ্ডন কৰি কুৰবানীৰ বাবে আগবঢ়োৱা গো দান মুখ্যমন্ত্ৰীয়ে দিয়া নাছিল বুলি দাবী কৰিছে বিজেপি নেতা বিল্লাল মিঞাই। বিজেপি নেতা গৰাকীৰ কাণ্ডক লৈ বিতৰ্ক সৃষ্টি হোৱাৰ পাছতেই দান দিয়া গোৰ সৈতে মুখ্যমন্ত্ৰী মাণিক সাহাৰ সম্পৰ্ক নাই বুলি উল্লেখ কৰে।
