আহমেদাবাদত সংঘটিত হ’ল দেশৰ দ্বিতীয় অন্যতম শিহৰণকাৰী বিমান দুৰ্ঘটনা। দুৰ্ঘটনাৰ খবৰ অহাৰ পিছৰে পৰা পোহৰলৈ আহিছে এটাৰ পিছত আন এটা শিহৰণকাৰী খবৰ। অভিশপ্ত বিমানখনৰ আন এক হৃদয় বিদাৰক ঘটনা পোহৰলৈ আহিছে। এটা পৰিয়াললৈ এই দুৰ্ঘটনাই নামি আহিল কাল অমানিশা!অভিশপ্ত বিমান দুৰ্ঘটনাত একেলগে মৃত্যু ভাতৃ-ভগ্নীৰ। নিহত দুই ভাতৃ-ভগ্নী ২৪ বছৰীয়া শুভ আৰু ২২ বছৰীয়া শগুন মোদী । মুহূৰ্ততে উদয়পুৰৰ পৰিয়াললৈ নামি আহিল কাল অমানিশা।
আহমেদাবাদত সংঘটিত হোৱা এয়াৰ ইণ্ডিয়াৰ বিমান দুৰ্ঘটনাত ৰাজস্থানৰ উদয়পুৰৰ ৪গৰাকী লোক আছিল। উদয়পুৰৰ মাৰ্বল ব্যৱসায়ী পিংকু মোদীৰ ২৪ বছৰীয়া পুত্ৰ শুভ আৰু ২২ বছৰীয়া কন্যা শগুন মোদী আছিল অভিশপ্ত বিমানখনত। আহমেদাবাদৰ পৰা লণ্ডনলৈ গৈ আছিল ৰুণ্ডেডা গাঁৱৰ ভাৰ্দি চান্দ মেনৰিয়া আৰু প্ৰকাশ মেনৰিয়াও। দুৰ্ঘটনাৰ খবৰ পোৱাৰ লগে লগেই আহমেদাবাদলৈ ৰাওনা হৈছে পিংকু মোদীৰ পৰিয়াল।
উদয়পুৰৰ মাৰ্বল ব্যৱসায়ী পিংকু মোদীৰ পুত্ৰ-কন্যা শুভ মোদী আৰু শগুন মোদী। দুয়োজনে MBA সম্পূৰ্ণ কৰিছিল আৰু পিতৃৰ ব্যৱসায়ত সহায় কৰি আছিল। দুয়োগৰাকী ভাতৃ-ভগ্নীয়ে ভ্ৰমণৰ বাবে লণ্ডনলৈ গৈছিল। লণ্ডনত তেওঁলোকে এজন বন্ধুৰ সৈতে থকাৰ পৰিকল্পনা কৰিছিল।
উদয়পুৰ জিলাৰ ৰুণ্ডেডা গাঁৱৰ বাসিন্দা ভাৰ্দি চান্দ মেনৰিয়া আৰু প্ৰকাশ মেনৰিয়াও একেখন বিমানতে আছিল। সূত্ৰ অনুসৰি দুয়োজনে লণ্ডনত চেফ হিচাপে কৰ্মৰত আছিল।
আহমেদাবাদৰ পৰা লণ্ডনলৈ উৰা মৰা বিমানখনত ক্ৰু মেম্বাৰসহ আছিল মুঠ ২৪২গৰাকী যাত্ৰী। আহমেদাবাদত দুৰ্ঘটনাগ্ৰস্ত বিমানখনত আছিল ১৬৯গৰাকী ভাৰতীয় আৰু ৬১গৰাকী বিদেশী। ইয়াৰ উপৰিও, ৫৩ জন ব্ৰিটিছ নাগৰিক, এজনে কানাডিয়ান আৰু সাত জন পোৰ্তুগীজ নাগৰিক দুৰ্ঘটনাগ্ৰস্ত বিমানত আছিল।
মাত্ৰ কেইটামান ছেকেণ্ডৰ ভিতৰেতে হেৰাই গ’ল ২ শতাধিকৰো অধিক জীৱন। এতিয়াও চিকিৎসাধীন হৈ আছে বহু লোক।
