May Day'ৰ অৰ্থ কি? বিমান দুৰ্ঘটনাৰ পূৰ্বে কিয় তিনিবাৰ 'May Day' বুলি কয় পাইলটে?

'May Day' হৈছে উৰাজাহাজ জগতৰ এনে এক শব্দ যাক কোনো পাইলটে‌ জীৱনত এবাৰো উচ্চাৰণ কৰিব নিবিচাৰে। 'May Day'ক একাংশই কিছু সময় পাছত হ'বলগীয়া মৃত্যু বুলিও কয়। আকাশমাৰ্গত উৰি থকা উৰাজাহাজ এখনৰ পৰা যেতিয়া পাইলটে ‌সকলো ধৰণৰ নিয়ন্ত্ৰণ হেৰুৱাই পেলায় তেতিয়া পাইলটে‌ তিনিবাৰ 'May Day' বুলি কয়।‌ 'May Day' হৈছে পাইলটে ATC অৰ্থাৎ এয়াৰ ট্ৰেফিক কন্ট্ৰলাৰলৈ পঠিওৱা এক বাৰ্তা।‌ 'May Day' বুলি বাৰ্তা পঠিয়াই পাইলটে স্পষ্ট কৰি দিয়ে যে বিমানখনৰ পৰা পাইলটে সকলো নিয়ন্ত্ৰণ হেৰুৱাই পেলাইছে আৰু যিকোনো প্ৰকাৰে ATCয়ে বিমানখন আৰু যাত্ৰীসকলৰ জীৱন ৰক্ষা কৰিব লাগে। 'May Day'ৰ বাৰ্তা শুনাৰ লগে লগেই ATCয়ে বিমানবন্দৰৰ সকলো গতিবিধি বাতিল কৰি কেৱল যিকোনো প্ৰকাৰে বিমানখনক অৱতৰণ কৰোৱাবলৈ চেষ্টা চলায়।‌ কিন্তু দুৰ্ভাগ্যবশত যে, আজিলৈকে পাইলটে 'May Day' বুলি কোৱাৰ পাছত সৰহ‌ সংখ্যক বিমানেই দুৰ্ঘটনাত পতিত হৈছে আৰু সহস্ৰাধিক লোকে প্ৰাণ হেৰুৱাইছে।

'May Day' ফ্ৰান্সৰ ''m'aider'' শব্দৰ পৰা গ্ৰহণ কৰা এক শব্দ। "m'aider"ৰ পৰা সৃষ্টি হোৱা 'May Day' শব্দটো ১৯২৩ চনত প্ৰথমবাৰৰ বাবে ব্যৱহাৰ কৰা‌ হৈছিল আৰু ইয়াক ১৯২৭ চনত আন্তঃৰাষ্ট্ৰীয় পৰ্যায়ত গ্ৰহণ কৰা হৈছিল। 

উল্লেখ্য যে, উৰাজাহাজ এখন আকাশমাৰ্গত উৰি থকাৰ সময়ত কিছুমান পৃথক শব্দৰে পাইলট আৰু ATCয়ে কথা পাতে যেনে 'Roger', 'Pan' আৰু 'May Day'। 'Roger'ৰ অৰ্থ হৈছে পাইলট আৰু ATCৰ মাজত চলা বাৰ্তা আদান প্ৰদানৰ সফল বুজাবুজি। আমি সাধাৰণতে ইংৰাজীত 'Ok' বুলি কোৱাৰ দৰেই ATCৰ নিৰ্দেশনা মানি পাইলটে 'Roger' বুলি কয়। ইফালে, বিমানত কোনোধৰণৰ টেকনিকেল সমস্যাই দেখা দিলে অথবা বিমানৰ এটা ইঞ্জিন বিকল হৈ পৰিলে পাইলটে 'Pan, Pan, Pan' বুলি কয়। কিন্তু এই প্ৰক্ৰিয়াত প্ৰাণহানি হোৱাৰ কোনোধৰণৰ আশংকা নাথাকে। আনহাতে, পাইলটে 'May Day, 'May Day, 'May Day' বুলি বাৰ্তা পঠিয়ালে ATCৰ কৰ্মচাৰী সকলৰো বুকু কপি উঠে।

মাচুম চৌধুৰী, NewzNow