মুখ্যমন্ত্ৰী হিমন্ত বিশ্ব শৰ্মাৰ পাছত ডিমা হাছাওৰ যুৱতী ৰশ্মিতা হোজাইৰ ৰহস্যজনক মৃত্যুৰ তদন্ত বিচাৰি উত্তৰাখণ্ডৰ মুখ্যমন্ত্ৰীলৈ পত্ৰ APCCৰ সভাপতি গৌৰৱ গগৈৰ।
গংগাৰ পানী-যুঁৱলিত উদ্ধাৰ হৈছিল ডিমা হাচাওৰ নিৰুদ্দিষ্ট ৰশ্মিতাৰ মৃতদেহ। ইয়াৰ পূৰ্ৱে হাফলঙৰ সোনটিলাৰ মেধাবী যুৱতী ৰশ্মিতা হোজাইৰ ৰহস্যজনক মৃত্যুৰ সঠিক তদন্তৰ দাবীৰে দেশৰ গৃহমন্ত্ৰীলৈ স্মাৰক পত্ৰ প্ৰেৰণ কৰিছিল হাফলঙৰ দল-সংগঠনে।
জিলা আয়ুক্তৰ জৰিয়তে গৃহমন্ত্ৰীলৈ স্মাৰক পত্ৰ প্ৰেৰণ কৰিছিল ডিমাছা জনগোষ্ঠীৰ সৰ্বোচ সামাজিক সংগঠন 'জাদিকে নাইছ' হাচম',ডিমাচা ছাত্ৰ সন্থাৰ লগতে ডিমাচা মাতৃ সমাজে।
ইফালে দুই যুৱক দিল্লীৰ হেমন্ত শৰ্মা আৰু হাৰিয়ানাৰ পংকজ ককাৰৰ বিৰুদ্ধে কন্যাক যৌন আতিশয্য চলাই হত্যা কৰাৰ অভিযোগ তুলি হাফলং থানাত এজাহাৰ দাখিল কৰে নিহত ৰশ্মিতাৰ মাতৃয়ে।
উল্লেখযোগ্য যে দিল্লীৰ পৰা উত্তৰাখণ্ডলৈ একেলগে ফুৰিবলৈ যাওঁতে ৰশ্মিতা সন্ধানহীন হোৱা বুলি উত্তৰাখণ্ডৰ শিবপুৰী থানাত এজাহাৰ দাখিল কৰিছিল এই দুই যুৱকে। অভিযোগ মতে ৰশ্মিতাই অনিচ্ছা সত্বেও প্ৰাক্তন সহপাঠী তথা প্ৰেমিক হেমন্ত শৰ্মাই জোৰ কৰাতহে দিল্লীত ৰেলৱে ৰিক্ৰুইটমেন্টৰ পৰীক্ষা দিবলৈ গৈছিল। ৫ জুনত পৰীক্ষা শেষ হোৱাৰ পিছত প্ৰেমিক হেমন্তৰ লগতে পংকজ ককাৰে বলপূৰ্বক ৰশ্মিতাক উত্তৰাখণ্ডৰ ঋষিকেশলৈ লৈ গৈছিল বুলি এজাহাৰত উল্লেখ কৰিছে মাতৃয়ে।
উল্লেখ্য যে যোৱা ৪ জুনত গুৱাহাটীৰ পৰা পৰীক্ষাৰ বাবে নতুন দিল্লীত গৈ উপস্থিত হৈছিল ইঞ্জিনীয়াৰিঙৰ স্নাতক ৰশ্মিতা হোজাই।
৫ জুনত পৰীক্ষা শেষ হোৱাৰ পিছৰে পৰা সন্ধানহীন হৈ আছিল মেধাবী যুৱতীগৰাকী।
মঙলবাৰে পুৱাৰ ভাগত উত্তৰাখণ্ডৰ গাড়োৱাল জিলাৰ পাউৰি অঞ্চলত গংগা নদীৰ পানী যুঁৱলিত উদ্ধাৰ হৈছিল ৰশ্মিতাৰ মৃতদেহ।
