শিক্ষাৰ গুণগত মান উন্নত কৰাৰ পৰিকল্পনা কৰা অসম চৰকাৰৰ শিক্ষা বিভাগৰেদ্বাৰা ন ন আঁচনি যুগুত কৰি হাজাৰ হাজাৰ শিক্ষক নিযুক্তি দিয়াৰ মাজতে বহু বিদ্যালয় বৰ্তমানে চলি আছে এজনীয়া শিক্ষকৰে। য'ত ছাত্ৰ ছাত্ৰীৰ অনুপাতে পূৰণ কৰা হোৱা নাই শিক্ষকৰ পদ। তেনে এখন স্কুলৰ নগ্ন স্বৰূপ পোহৰলৈ আহিছে মাৰ্ঘেৰিটা সম জিলাৰ অন্তৰ্গত জাগুনৰ কথাচেমা গাঁৱত। ১৯৭৪ চনত স্থাপন হোৱা জাগুন কথাচেমা প্ৰাথমিক বিদ্যালয়ত আজিও উপলব্ধ নহয় ছাত্ৰ ছাত্ৰীৰ অনুপাতে শিক্ষকৰ সংখ্যা। যাৰ ফলত বিদ্যালয় খনত বৰ্তমানে দেখা গৈছে এক অভাৱনীয় পৰিস্থিতি
শিক্ষা বিভাগৰ নীতি নিৰ্দেশনা অনুসৰি প্ৰাথমিক বিদ্যালয়ত প্ৰতি ৩০ গৰাকী ছাত্ৰ ছাত্ৰীৰ অনুপাতে এজনকৈ শিক্ষক নিযুক্তি দিব লাগে যদিও উক্ত বিদ্যালয় খনত ১২৮ গৰাকী ছাত্ৰ ছাত্ৰীৰ অনুপাতে এজন শিক্ষকে দায়িত্ব পালন কৰি আহিছে। গীৰিন্দ্ৰ নাথ ফুকন নামৰ শিক্ষক জনে জানুৱাৰী মাহৰ আৰম্ভণিৰে পৰা বিদ্যালয় খনত অকলে সকলো দায়িত্ব পালন কৰি আহিছে। যাৰ ফলত ছয়টা কৈ শ্ৰেণীত একে সময়তে পাঠ দান কৰাৰ লগতে বিভাগীয় কামকাজ সমূহ অকলে চলাই নিয়া প্ৰায় অসম্ভৱ হৈ পৰিছে। ফলত বিদ্যালয় খনত ছাত্ৰ ছাত্ৰী সকলে পৰ্যাপ্ত শিক্ষা লাভ নকৰাৰ বাবে গুণগত মানদণ্ডৰ ফালৰ পৰা শিক্ষাৰ্থীসকল এক অনিশ্চয়তাৰ ভৱিষ্যতলৈ আগবাঢ়ি যোৱাহে পৰিলক্ষিত হৈছে।
বৰ্তমান সময়ত চৰকাৰী খণ্ডৰ বিদ্যালয় সমূহত পৰ্য্যাপ্ত ছাত্ৰ ছাত্ৰী নথকাৰ ফলত বহু বিদ্যালয় চৰকাৰে বন্ধ কৰিব লগাৰ সময়তে ১২৮ গৰাকীকৈ ছাত্ৰ ছাত্ৰী থকা বিদ্যালয় খনত এজন শিক্ষকে পাঠদান কৰিব লগা বিষয়টোৱে জাগুনৰ সচেতন মহলৰ মাজত তীব্ৰ প্ৰতিক্ৰিয়াৰ সৃষ্টি হোৱা পৰিলক্ষিত হৈছে।
বিদ্যালয় খনত ছাত্ৰ ছাত্ৰীৰ অনুপাতে পাঁচজন শিক্ষক নিযুক্তি দিব লাগে যদিও অতি কমেও চাৰিজন শিক্ষক নিযুক্তি দি ছাত্ৰ ছাত্ৰী সকলৰ ভৱিষ্যত সুৰক্ষিত কৰিবলৈ স্থানীয় ৰাইজ তথা বিভিন্ন দল সংগঠনে অসম চৰকাৰৰ মুখ্য মন্ত্ৰী আৰু শিক্ষা মন্ত্ৰীক ব্যৱস্থা গ্ৰহণ কৰিবলৈ আহ্বান জনাইছে।
