দেশৰ ৪ খন ৰাজ্যৰ ৫টা বিধানসভা সমষ্টিৰ বাবে অনুষ্ঠিত উপ-নির্বাচনৰ ফলাফল ঘোষণা। গুজৰাটৰ বিশ্বভাডৰ বিধানসভা সমষ্টিত বিজেপি প্ৰাৰ্থীক পৰাস্ত কৰি জয়ী হ'ল আম আদমী পাৰ্টিৰ প্ৰাৰ্থী। গুজৰাটৰ বিশ্বভাডৰ সমষ্টিত ১৭,৫৫৪ টা ভোটৰ ব্যৱধানত পৰাস্ত হ'ল বিজেপি প্ৰাৰ্থী কীৰ্তি পেটেল। আপৰ প্ৰাৰ্থী গোপাল ইটালিয়াৰ হাতত গুজৰাটৰ বিশ্বভাডৰ সমষ্টিত পৰাস্ত হ'ল বিজেপিৰ প্ৰাৰ্থী গৰাকী। বিশ্বভাডৰ বিধানসভা সমষ্টিত আপৰ প্ৰাৰ্থী গৰাকীয়ে ৭৫,৯৪২ টা ভোট লাভ কৰাৰ বিপৰীতে বিজেপিৰ প্ৰাৰ্থী গৰাকীয়ে লাভ কৰে ৫৮,৩৮৮ টা ভোট। আনহাতে, গুজৰাটৰ কডী বিধানসভা সমষ্টিৰ উপ নিৰ্বাচনত জয়ী হ'ল বিজেপিৰ ৰাজেন্দ্ৰ চাৱড়া। সমষ্টিটোত কংগ্ৰেছৰ প্ৰাৰ্থী ৰমেশ চাৱড়াক ৩৯,৪৫২ টা ভোটৰ ব্যৱধানত পৰাস্ত কৰি জয় লাভ কৰে বিজেপিৰ প্ৰাৰ্থী গৰাকীয়ে।
উল্লেখযোগ্য যে,গুজৰাটত দুদিনীয়াকৈ কংগ্ৰেছ ৱৰ্কিং কমিটিৰ বৈঠক অনুষ্ঠিত হৈছিল যদিও উপ নিৰ্বাচনত ধৰাশায়ী হ'ল কংগ্ৰেছ। গুজৰাট,কেৰালা, পশ্চিম বংগ আৰু পঞ্জাৱৰ ৫ টা বিধানসভা সমষ্টিত অনুষ্ঠিত হৈছিল উপ নিৰ্বাচন। পঞ্জাৱৰ লুধিয়ানাৰ বিধানসভা সমষ্টিৰ উপ নিৰ্বাচনত কংগ্ৰেছ প্ৰাৰ্থীক পৰাস্ত কৰি জয়ী হ'ল আপৰ সঞ্জীৱ আৰোৰা। কংগ্ৰেছ প্ৰাৰ্থী ভাৰত ভুষণ আশূক ১০,৬৩৭ টা ভোটৰ ব্যৱধানত পৰাস্ত কৰে আপৰ সঞ্জীৱ আৰোৰাই। আনহাতে পশ্চিম বংগৰ কালিগঞ্জ বিধানসভা সমষ্টিৰ উপ নিৰ্বাচনত TMC ৰ হাতত পৰাস্ত হ'ল বিজেপি প্ৰাৰ্থী। তৃণমূল কংগ্ৰেছৰ অলিফা আহমদৰ হাতত ৫০,০৪৯ টা ভোটৰ ব্যৱধানত পৰাস্ত হ'ল বিজেপি প্ৰাৰ্থী আশীষ ঘোষ।
আনহাতে, কেৰালাৰ নিলাম্বৰ বিধানসভা সমষ্টিৰ উপ নিৰ্বাচনত CPI(M) ৰ প্ৰাৰ্থীক পৰাস্ত কৰি জয়ী হ'ল কংগ্ৰেছৰ প্ৰাৰ্থী। সমষ্টিটোত কংগ্ৰেছ প্ৰাৰ্থী আৰ্যদান চৌকাতে ১১,০৭৭ টা ভোটৰ ব্যৱধানত পৰাস্ত কৰে CPI(M) ৰ প্ৰাৰ্থী এম স্বৰাজক।