ঈদৰ পাছত উদ্ভৱ হোৱা গো-মাংস বিতৰ্কৰ পিছতেই আজি মুখ্যমন্ত্ৰী ড০ হিমন্ত বিশ্ব শৰ্মাই ধুবুৰীত উপস্থিত হৈ এক কড়া সতৰ্কবাণী জাৰি কৰে। মুখ্যমন্ত্ৰীয়ে স্পষ্টভাৱে কয় — "ধৰ্মীয় সংহতি উলংঘনকাৰীৰ ক্ষমা নাই।" মুখ্যমন্ত্ৰীৰ কয় যে, গো-মাংস বিতৰ্কৰ মূল অভিযুক্ত মিণ্টু আলীক ইতিমধ্যে চিনাক্ত কৰা হৈছে আৰু তেওঁক শীঘ্ৰেই আত্মসমৰ্পণ কৰিবলৈ নিৰ্দেশ দিয়া হৈছে। যদি তেওঁ আত্মসমৰ্পণ নকৰে, তেন্তে আইনে নিজৰ পথত আগবঢ়িব বুলি মুখ্যমন্ত্ৰীয়ে কঠোৰ সুৰত সকিয়নী দিয়ে ।
এই ঘটনাৰ পৰিপ্ৰেক্ষিতত এতিয়ালৈকে প্ৰায় ১৫০ জন লোকক গ্ৰেপ্তাৰ কৰা হৈছে, যাৰ ভিতৰত বিতৰ্কমূলক ভিডিঅ', উত্তেজনামূলক উক্তি আৰু স্থানীয় হিংসাত্মক ঘটনা সংগঠনৰ অভিযোগত জড়িত ব্যক্তি আছে। ইফালে আৰক্ষী বিভাগৰ তদন্তত এটা নতুন তথ্যও ওলাই আহিছে — নবীন বাংলা নামৰ সন্ত্ৰাসবাদী গোটৰ এজন সদস্যকো এই ঘটনাৰ সৈতে সম্পৰ্কিত বুলি সন্দেহ কৰা হৈছে। মুখ্যমন্ত্ৰীয়ে এই সন্দেহক গম্ভীৰভাৱে লৈ, অধিক তদন্ত কৰাৰ নিৰ্দেশ দিয়ে।
ৰাজ্য চৰকাৰে ধুবুৰীত স্থায়ী আৰ্মী কেম্প স্থাপনৰো সিদ্ধান্ত লৈছে যাতে সীমান্ত অঞ্চলত নিৰাপত্তা ব্যৱস্থা অধিক শক্তিশালী কৰা যায়। মুখ্যমন্ত্ৰীয়ে কয় — "ধুবুৰী সীমান্ত এলেকাত স্থায়ী সামৰিক উপস্থিতি খুবেই প্ৰয়োজন।"
এই সম্প্ৰসাৰিত ব্যৱস্থাৰ জৰিয়তে চৰকাৰে ধুবুৰীৰ সামাজিক শান্তি, ধৰ্মীয় সম্প্ৰীতি আৰু সীমান্ত নিৰাপত্তা সুনিশ্চিত কৰিবলৈ পদক্ষেপ গ্ৰহণ কৰিছে।
