পাকিস্তানৰ প্ৰতি উদাৰ নীতি গ্ৰহণ কৰি এতিয়া নিজেই বিপদৰ আগজাননী লাভ কৰিছে আমেৰিকাই। ভাৰতে আক্ৰমণ কৰাৰ পাছত অতি সংগোপনে পৰমাণু সংযুক্ত বেলেষ্টিক মিছাইলৰ নিৰ্মাণ কাম আৰম্ভ কৰিছে পাকিস্তানে। ৫ হাজাৰ কিঃমিঃ পৰ্যন্ত টাৰ্গেট বিধস্ত কৰাৰ ক্ষমতা আছে পাকিস্তানে পৰীক্ষণ কৰিবলৈ আগবঢ়া আন্তঃমহাদেশীয় বেলেষ্টিক মিছাইলৰ। পাকিস্তানে নিৰ্মাণ কৰি থকা পৰমাণু সংযুক্ত বেলেষ্টিক মিছাইলে আমেৰিকা পৰ্যন্ত আক্ৰমণ কৰিব পৰা ক্ষমতা আছে। পাকিস্তানৰ পাৰমাণৱিক মিছাইলৰ সন্দৰ্ভত এক চাঞ্চল্যকৰ প্ৰতিবেদন প্ৰকাশ কৰিছে আমেৰিকাৰ বিখ্যাত আলোচনী 'ফৰেইন এফেয়াৰ্ছ'ত। যদি পাকিস্তানে পাৰমাণৱিক মিছাইল পৰীক্ষণ কৰে তেন্তে আমেৰিকাই শত্ৰু ৰাষ্ট্ৰ হিচাপে ঘোষণা কৰিব পাৰে পাকিস্তানক। বৰ্তমান ৰাছিয়া, চীন আৰু উত্তৰ কোৰিয়াক শত্ৰু ৰাষ্ট্ৰ হিচাপে গণ্য কৰি আহিছে আমেৰিকাই।
উল্লেখযোগ্য যে,ভাৰতে চলোৱা 'অপাৰেচন সিন্দূৰ'ৰ সময়ত আমেৰিকাৰ পৃষ্ঠপোষকতাতে IMF ৰ পৰা ৮,৫০০ কোটি টকাৰ ঋণ লাভ কৰিছিল পাকিস্তানে। তথ্য অনুসৰি, বৰ্তমান পাকিস্তানৰ হাতত মজুত আছে ১৭০ টা পাৰমাণৱিক মাৰাণাস্ত্ৰ।
চৰ্চা অনুসৰি, ভাৰত বিৰোধী কাৰ্যত আমেৰিকাই হস্তক্ষেপ নকৰিবলৈ একপ্ৰকাৰে হেঁচা প্ৰয়োগ কৰিছে পাকিস্তানে। বৰ্তমান ২,৭০০ কিঃমিঃ পৰ্যন্ত টাৰ্গেট কৰিব পৰা শ্বাহীন-তৃতীয় প্ৰজন্মৰ মিছাইল আছে পাকিস্তানৰ। অৱশ্যে পাকিস্তানে ৫ হাজাৰ কিঃমিঃ পৰ্যন্ত টাৰ্গেট বিধস্ত কৰিব পৰা পাৰমাণৱিক মিছাইল পৰীক্ষণে ভৱিষ্যতে বিপদত পেলাব পাৰে আমেৰিকাক। ইছলামবাদে চীনৰ সহায়ত পাৰমাণৱিক অস্ত্ৰৰ মজুত বৃদ্ধি কৰাত গুৰুত্ব আৰোপ কৰাত আভ্যন্তৰীণ চাপৰ সন্মুখীন হৈছে হোৱাইট হাউচ।
