প্ৰমোদ বড়োৰ বিটিআৰত সংঘটিত দুৰ্নীতিয়ে চকু কপালত তুলিছে সাধাৰণ জনতাৰ

প্ৰমোদ বড়োৰ বিটিআৰত সংঘটিত দুৰ্নীতিয়ে চকু কপালত তুলিছে সাধাৰণ জনতাৰ। ৩৩ নং ননৈ চেৰফাং পৰিষদীয় সমষ্টিৰ গৰুৱাঝাৰ‌ VCDC ত প্ৰধান মন্ত্ৰী আৱাস যোজনাৰ গৃহ নিৰ্মাণত ব্যাপক দুৰ্নীতি। ভেৰগাঁও খণ্ড উন্নয়ন বিষয়াৰ কাৰ্যালয়ৰ কৰ্মচাৰীৰ সৈতে মিতিৰালি কৰি জালিয়াতিৰে ধন আত্মসাৎ কৰাৰ অভিযোগ ভিচিডিচিৰ অধ্যক্ষ চাবেদ আলীৰ বিৰুদ্ধে।
হাগ্ৰামাৰ ১৭ বছৰীয়া শাসনকালৰ দুৰ্নীতি ভ্ৰষ্টাচাৰক চেলেঞ্জ কৰি চুইজাৰলেণ্ডৰ সপোন ৰচা প্ৰমোদ বড়োৰ পাঁচ বছৰীয়া শাসনত বিভিন্ন বিভাগত সংঘটিত দুৰ্নীতি আৰু অপশাসনে এতিয়া সাধাৰণ জনতাক মাধমাৰ সোধাইছে ।
বিশেষকৈ বিটিআৰৰ ভিচিডিচি সমূহত প্ৰধানমন্ত্ৰী আৱাস গৃহ আঁচনিত ব্যাপক অনিয়ম সংঘটিত হোৱাৰ অভিযোগ দিৰ্ঘদিনীয়া। 
একাংশ ভিচিডিচিৰ অধ্যক্ষ , তথা খণ্ড উন্নয়ন বিষয়াৰ কাৰ্যালয়ৰ কৰ্মচাৰী আৰু ঠিকাদাৰ ৰূপী একাংশ দলীয় নেতা-কৰ্মীৰ ছত্ৰছায়াত  অনিয়ম সংঘটিত হোৱাৰ অভিযোগ।এনে অনিয়ম আৰু দুৰ্নীতিত হাত উজান দিছে উন্নয়ন খণ্ড সমূহৰ একাংশ বিষয়া কৰ্মচাৰীয়েও।
 মুঠতে প্ৰধানমন্ত্ৰী আৱাস গৃহ নিৰ্মাণৰ সকলো চৰকাৰী নীতি নিৰ্দেশনাক ভৰিৰে একাংশ দলীয় নেতা-কৰ্মী , নেতা-পালিনেতাকে ধৰি ভিচিডিচিৰ অধ্যক্ষয় গৃহ নিৰ্মাণৰ নামত চলাই গৈছে অবাধ লুণ্ঠন । ওদালগুৰিৰ ভেৰগাঁও উন্নয়ন খণ্ডৰ অন্তৰ্গত গৰুৱাঝাৰ ভিচিডিচিত প্ৰধানমন্ত্ৰী আৱাস যোজনাত সংঘটিত অনিয়মে সচেতন মহলৰ চকু কপালত তুলিছে। গৰুৱাঝাৰ ভিচিডিচিৰ অধ্যক্ষ চাবেদ আলীৰ অতপালিত অতিষ্ঠ প্ৰধানমন্ত্ৰী আৱাস গৃহৰ একাংশ হিতাধিকাৰী। ভিচিডিচিটো বহু লোকৰ চৰকাৰী আৱাস গৃহ নিৰ্মাণত সংঘটিত কৰিছে ব্যাপক দুৰ্নীতি। আনকি অন্য লোকক হিতাধিকাৰী সজাই অন্য ব্যক্তিৰ নামত একাউন্ট খুলি  আৱাস গৃহৰ নামত আৱন্টিত সমূদায় ধন আত্মসাৎ কৰিছে অধ্যক্ষ চাবেদ আলীয়ে।
ইফালে শাসকীয় ইউপিপিএলৰ ভিচিডিচি অধ্যক্ষ গৰাকীয়ে নীতি বৰ্হিভুতভাৱে ঠিকাদাৰ নিয়োগ কৰাৰো অভিযোগ উঠিছে। দীৰ্ঘদিন ধৰি দুৰ্নীতি সংঘটিত কৰি অহা অধ্যক্ষ আৰু ভেৰগাঁও খণ্ড উন্নয়ন বিষয়াৰ কৰ্মচাৰী সকলৰ বিৰুদ্ধে প্ৰমোদ বড়ো , তথা মুখ্যমন্ত্ৰীয়ে কেনে ধৰণৰ ব্যৱস্থা গ্ৰহণ কৰে সেইটোহে লক্ষণীয় হ'ব।

Share This Article
Leave a Comment

Leave a Reply

Your email address will not be published. Required fields are marked *