সাংবাদিকক অপমান কৰা কাৰ্যক তীব্ৰ গৰিহণা গুৱাহাটী প্ৰেছ ক্লাবৰ।
কালি ২৭ জুন, ২০২৫ ত এখন সংবাদমেলত ৰাজ্যৰ কেবিনেট মন্ত্ৰী জয়ন্ত মল্ল বৰুৱাই সাংবাদিক উদ্দেশ্যি যি ধৰণৰ উদ্ভট আৰু অসাংবিধানিক ভাষা প্ৰয়োগ কৰিছে তাক গুৱাহাটী প্ৰেছ ক্লাবে তীব্ৰ গৰিহণা দিছে। উক্ত কাৰ্যৰ প্ৰতিবাদত আজি দিনৰ ১২ বজাত গুৱাহাটী প্ৰেছ ক্লাবৰ চৌহদত এটি প্ৰতিবাদী কাৰ্যসূচী আহ্বান কৰা হৈছে। গুৱাহাটী প্ৰেছ ক্লাবত সকলো সাংবাদিক লগ হৈ প্ৰতিবাদী ধ্বনিৰে আমি আমাৰ প্ৰতিবাদ সাব্যস্ত কৰিম। লগতে সাংবাদিকক কৰ্মক্ষেত্ৰত দুৰ্ব্যৱহাৰ কৰা যিকোনো লোককে প্ৰেছ ক্লাবৰ পৰা পুনৰবাৰ সকীয়াই দিয়া হল যে গণতন্ত্ৰৰ চতুৰ্থ স্তম্ভৰ ওপৰত অনাহকত কটু মন্তব্য নকৰিব। অন্যথা সাংবাদিকসকলে সংশ্লিষ্ট ব্যক্তিৰ যিকোনো বা-বাতৰি বৰ্জন কৰিবলৈ বাধ্য হব।
সাংবাদিক সকলক আক্ৰমণ আৰু তুচ্ছ তাচ্ছিল্য কৰাৰ ঘটনাক গুৱাহাটী প্ৰেছ ক্লাবৰ গৰিহণা। সাংবাদিকসকল ৰাজনীতিবিদসকলৰ পৰা বাৰম্বাৰ আক্ৰমণৰ সন্মুখীন হোৱাৰ ঘটনাক তীব্ৰ নিন্দা জনাইছে গুৱাহাটী প্ৰেছ ক্লাবে। সাংসদ, বিধায়ক, মন্ত্ৰী আৰু বিভিন্ন দলৰ অন্যান্য বিষয় ববীয়াৰ মাজত আমি এনে এক ভয়াৱহ প্ৰৱণতা লক্ষ্য কৰিছো য’ত তেওঁলোকৰ বাবে অস্বস্তিজনক প্ৰশ্ন বা তেওঁলোকৰ অপ্ৰিয় প্ৰশ্ন উত্থাপনৰ বাবে ৰাজনীতিবিদসকলে সাংবাদিকক আক্ৰমণৰ লক্ষ্য কৰি লয়।
গুৱাহাটী প্ৰেছ ক্লাবে পূৰ্বেও এই বিষয়ত উদ্বেগ প্ৰকাশ কৰিছিল আৰু ৰাজনৈতিক নেতাসকলক এনে অশুভ আচৰণৰ পৰা বিৰত থাকিবলৈ আহ্বান জনাইছিল। কোনো ব্যক্তিৰ সাংবাদিকৰ প্ৰশ্নৰ উত্তৰ নিদিয়াৰ অধিকাৰ নিশ্চয় আছে, কিন্তু তেওঁলোকে সাংবাদিক বা তেওঁলোকৰ সংবাদ মাধ্যমৰ স্বাধীনতাৰ ওপৰত প্ৰশ্ন উত্থাপন কৰি অপমান কৰাৰ অধিকাৰ নাই । যদি ৰাজনৈতিক নেতাসকল প্ৰশ্নৰ সন্মুখীন হ’বলৈ সাজু নহয়, তেন্তে তেওঁলোকে সাংবাদিকসকলক সংবাদমেললৈ আমন্ত্ৰণ নজনাই কেৱল নিজৰ একপক্ষীয় বিবৃতি জাৰি কৰিলেই হ'ল। আমি পুনৰ দাবি জনাইছো যে ৰাজনীতিবিদ আৰু অন্যান্য ব্যক্তিয়ে কেৱল তেওঁলোকৰ অপচন্দৰ প্ৰশ্ন সুধাৰ বাবে সাংবাদিকসকলক আক্ৰমণৰ লক্ষ্য কৰি লোৱাৰ পৰা বিৰত থাকিব লাগে, কিয়নো এনে আচৰণ গণতান্ত্ৰিক দেশৰ চেতনাৰ বিৰুদ্ধে আৰু সংবাদ মাধ্যমৰ স্বাধীনতাত হস্তক্ষেপ।
