ইৰাণে পাৰমাণৱিক ঘাটি বন্ধ নকৰিলে আকৌ আমেৰিকাই আক্ৰমণ কৰিব ইৰাণৰ প্ৰতিটো পাৰমাণৱিক ঘাটিত। ইৰাণ-ইজৰাইলৰ যুদ্ধ কিছু শাম কটাৰ সময়তে পুনৰ ইৰাণক সকিয়নি দিলে আমেৰিকাই। ইৰাণে ইউৰেনিয়াম সমৃদ্ধিকৰণত আগবাঢ়িলেই পাৰমাণৱিক ঘাটিত পুনৰ আক্ৰমণৰ বাবে সাজু আমেৰিকা- সকিয়নি ট্ৰাম্পৰ।
মধ্যপ্ৰাচ্যৰ এই দুই দেশৰ মাজত প্ৰত্যক্ষ যুদ্ধ শাম কাটিলেও কূটনৈতিক আক্ৰমণ-প্ৰত্যাক্ৰমণ অব্যাহত আছে। ইফালে পাৰমাণৱিক ঘাটিক লৈয়ে সৃষ্টি হোৱা ইজৰাইল আমেৰিকাই ইৰাণ আক্ৰমণ কৰিলেও ইৰাণে নিজৰ পাৰমাণৱিক কাম-কাজ বন্ধ কৰাৰ কোনো ইংগিত দিয়া নাই। বৰঞ্চ বাধাহীনভাৱে পাৰমাণৱিক ঘাটিৰ কাম কৰিবলৈ লৈছে আন এক সিদ্ধান্ত। সেই অনুসৰি ইৰাণৰ সংসদে ৰাষ্ট্ৰসংঘৰ অধীনৰ আন্তঃৰাষ্ট্ৰীয় আণৱিক শক্তি সংস্থা চমুকৈ IAEAৰ সৈতে সহযোগিতাৰে কাম নকৰাৰ সিদ্ধান্ত গ্ৰহণ কৰিছে।
ইৰাণে অভিযোগ কৰিছে যে আন্তঃৰাষ্ট্ৰীয় সংস্থাটোৱে একপক্ষীয় ভূমিকা গ্ৰহণ কৰিছে। উল্লেখযোগ্য যে, IAEAই ইৰাণৰ পাৰমানৱিক ঘাটি পৰিদৰ্শন কৰি দেশখনেপাৰমাণৱিক অস্ত্ৰ নিৰ্মাণৰ দিশে আগবঢ়াৰ ইংগিত দিয়াৰ পাছতেই ইজৰাইলে ইৰাণৰ পাৰমাণৱিক ঘাটিত আক্ৰমণ কৰিছিল।
আনহাতে ট্ৰাম্পৰ আন এটা মন্তব্যকলৈও ক্ষোভিত হৈ পৰিছে ইৰাণ। ইৰাণৰ সৰ্বোচ্চ নেতা আয়াতুল্লা আলী খামেনেইক ‘অপঘাত মৃত্যু’ৰ পৰা ৰক্ষা কৰা বুলি আমেৰিকাৰ ৰাষ্ট্ৰপতি গৰাকীয়ে পূৰ্বে মন্তব্য কৰিছিল। ট্ৰাম্পৰ এই মন্তব্যত ক্ষোভিত হৈ ইৰাণৰ বিদেশ মন্ত্ৰী আব্বাছ আৰাগছিয়ে কয় যে, যদি প্ৰকৃততে আলোচনা বিচাৰিছে তেন্তে ট্ৰাম্পে এনে অসন্মানজনক মন্তব্য কৰা উচিত নহয়। একেসময়তে ইৰাণৰ বিদেশ মন্ত্ৰীগৰাকীয়ে ইজৰাইলৰ বিৰুদ্ধে তীৰ্যক মন্তব্য কৰে। ইৰাণৰ মিছাইল আক্ৰমণৰ তীব্ৰতা সহ্য কৰিব নোৱাৰি ইজৰাইলে আমেৰিকাৰ শৰণাপন্ন হোৱা বুলি কটাক্ষ কৰাৰ লগতে ইৰাণক পুনৰ জোকাই ল’লে ইৰাণে প্ৰকৃত শক্তি দেখুৱাবলৈ কুণ্ঠাবোধ নকৰে বুলিও সকিয়াই দিয়ে।
