থানাৰ দুৱাৰে দুৱাৰে ঘূৰি বিহ পান কৰিলে মুকুন্দই। মৃত পুত্ৰৰ বাবে ন্যায় নোপোৱাৰ কাৰনে আত্মহননৰ পথ বাছি ল'লে মুকুন্দই। ৯ দিন পূৰ্বে মৃত্যু হল সৰু পুত্ৰ। ডাঙৰ পুত্ৰ জীৱন মৃত্যুৰ সৈতে যুঁজি আছে।
২২ জুন ২০২৫ ত তিনিচুকীয়া বৰপথাৰ দাস পাড়া নিবাসী মুকুন্দ দে আৰু তুলসী দেৰ দুই পুত্র ক্রমে ২৩ বছৰীয়া গৌৰব আৰু ২১ বছৰীয়া শুভ গুইজানস্থিত মামাৰ ঘৰৰ পৰা ঘৰলৈ ঘূৰি অহাৰ সময়ত এখন বিলাসী বাহনৰ লগত মুখামুখি সংঘৰ্ষ হয়। ফলত থিতাতে নিহত হয় শুভ, গুৰুতৰ ভাবে আহত হয় গৌৰব। বৰ্তমানেও গৌৰব এখন ব্যাক্তিগত চিকিৎসালয়ত জীৱন মৃত্যুৰ সৈতে যুঁজি আছে। আনহাতে গাড়ীখনৰ চালক আছিল চিৰাগ জিন্দল।
এই ঘটনাৰ পাছত মুকুন্দ আৰু তেওৰ স্ত্ৰীয়ে ন্যায় বিছাৰি বহুবাৰ গুইজান আৰু তিনিচুকীয়া থানাৰ দাৰস্থ হয় যদিও, অভিযোগ মতে আৰক্ষীৰ সহযোগ পোৱা নাই। এই দুখতে মুকুন্দই বিহ পান কৰি আত্মহননৰ চেষ্টা চলায়। বৰ্তমানে মুকুন্দ মেডিকেল কলেজত সংকটজনক অৱস্থাত আছে।
পৰিয়ালে আৰক্ষীৰ ওপৰত বহু প্ৰশ্ন উত্থাপিত কৰিছে। অভিযোগ অনুসৰি আৰক্ষীয়ে সঠিক তদন্ত কৰা নাই। আৰক্ষী গাড়ী চালক চিৰাগক লৈ কোনো তদন্ত নকৰাৰ অভিযোগ উত্থাপিত কৰিছে পৰিয়ালে।
