গোলাঘাটত মুখ্যমন্ত্ৰীৰ গাড়ীলৈ বটল নিক্ষেপ কৰা নাছিল। আনকি কনভয়টোও নাছিল মুখ্যমন্ত্ৰী হিমন্ত বিশ্ব শৰ্মা। কনভয়টো আছিল মন্ত্ৰী অতুল বৰাৰহে। AS01GF6600 নম্বৰৰ গাড়ীখনত সেই সময়ত আছিল অতুল বৰাৰ লগতে বিধায়ক মৃণাল শইকীয়া। গোলাঘাট সদৰ আৰক্ষী থানাত খোদ আৰক্ষীয়ে দাখিল কৰিছিল এজাহাৰ। আৰক্ষীয়ে দাখিল কৰা এজাহাৰখন ভাইৰেল হৈ পৰাৰ পিছতেই লাভ কৰিছে চৰ্চা। সমান্তৰালভাৱে চৰ্চা চলিছে এজন মন্ত্ৰীৰ গাড়ীলৈও বটল দলিওৱাতো অপৰাধেই ।
উল্লেখ্য যে, গৰুখুটিৰ গীৰ গাই দুৰ্নীতিৰ বিৰুদ্ধে গোলাঘাটত কংগ্ৰেছে কৰিছিল প্ৰতিবাদ। মুখ্যমন্ত্ৰী হিমন্ত বিশ্ব শৰ্মাক ক'লা পতাকা প্ৰদৰ্শন কৰিছিল একাংশ প্ৰতিবাদকাৰীয়ে। সেই প্ৰতিবাদৰ মাজতেই মুখ্যমন্ত্ৰীৰ গাড়ীলৈ বটল দলিওৱাৰ অভিযোগ উত্থাপন হৈছিল। তাৰ পিছতেই মুখ্যমন্ত্ৰীলৈ বটল নিক্ষেপকলৈ বিজেপিও কৰিছে প্ৰতিবাদ। আজি মুখ্যমন্ত্ৰীলৈ বটল নিক্ষেপ কৰা সন্দৰ্ভত ধনটি ডেকা ওৰফে দীপাংকৰ ডেকাক গ্ৰেপ্তাৰ কৰা হয়। তাৰ পিছতেই ভাইৰেল হৈ পৰিছে আৰক্ষীয়ে থানাত দাখিল কৰা এজাহাৰ। য'ত স্পষ্ট আছে বটল নিক্ষেপ কৰিছিল মন্ত্ৰী অতুল বৰাৰ কনভয়লৈ। তথাপিও এজন মন্ত্ৰীৰ গাড়ীলৈও বটল দলিওৱা কাৰ্যত ধিক্কাৰ দিছে সৰ্বত্ৰে।
