পুনৰবাৰ বিজেপিৰ পৰৱৰ্তী ৰাষ্ট্ৰীয় সভাপতি হিচাপে নাম চৰ্চিত হৈছে ৰাজনাথ সিঙৰ

চলিত মাহতেই  নিৰ্বাচিত হ'ব পাৰে বিশ্বৰ সৰ্ববৃহৎ ৰাজনৈতিক দল বিজেপ ৰাষ্ট্ৰীয় সভাপতি। ইতিমধ্যে দলটোৱে ৰাষ্ট্ৰীয় সভাপতি নিৰ্বাচিত কৰিবলৈ নিযুক্তি দিছে ১৯ খন ৰাজ্যৰ সভাপতি। বৰ্তমানৰ বিজেপিৰ ৰাষ্ট্ৰীয় সভাপতি জে পি নাড্ডাৰ উত্তৰসূৰীক লৈ দীৰ্ঘদিনে চলা মন্থনৰ অন্তত চূড়ান্ত হৈছে নাম।বিজেপিৰ হাইকামাণ্ড আৰু RSS ৰ নেতৃত্বই পৃথকে পৃথকে প্ৰস্তাৱ কৰিছে ৰাষ্ট্ৰীয় সভাপতিৰ নাম। সকলোকে হতবাক কৰি পুনৰবাৰ বিজেপিৰ পৰৱৰ্তী ৰাষ্ট্ৰীয় সভাপতি হিচাপে নাম চৰ্চিত হৈছে ৰাজনাথ সিঙৰ। 
পুনৰবাৰ বিজেপিত বাজপেয়ীৰ দিন ঘূৰাই আনিবলৈ দলটোৰ ৰাষ্ট্ৰীয় সভাপতিৰ দায়িত্ব পাব নেকি ৰাজনাথ সিঙে ? ২০০৫ চনত আৰু ২০১৩ চনত দুবাৰকৈ বিজেপিৰ ৰাষ্ট্ৰীয় সভাপতিৰ দায়িত্ব লাভ কৰিছিল বৰ্তমানৰ মোদী কেবিনেটৰ প্ৰতিৰক্ষা মন্ত্ৰী ৰাজনাথ সিঙে। ২০২৫ চনত লাল কৃষ্ণ আদৱানীয়ে পদত্যাগ কৰাৰ পাছত বিজেপিৰ ৰাষ্ট্ৰীয় সভাপতিৰ দায়িত্ব লাভ কৰিছিল ৰাজনাথ সিঙে। সেইসময়ত লাল কৃষ্ণ আদৱানীৰ উত্তৰসূৰী হিচাপে RSS য়ে প্ৰস্তাৱ কৰিছিল জ্যেষ্ঠ নেতা ৰাজনাথ সিঙৰ নাম। বৰ্তমানেও বিজেপিৰ পৰৱৰ্তী তথা নাড্ডাৰ উত্তৰসূৰী হিচাপে ৰাজনাথ সিঙৰ নাম প্ৰস্তাৱ কৰিছে RSS য়ে। 
২০১৩ চনৰ বিজেপিৰ ৰাষ্ট্ৰীয় সভাপতি নীতিন গাডকাৰীৰ বিৰুদ্ধে কেলেংকাৰিৰ অভিযোগ উত্থাপিত হোৱাত দলটোৰ ৰাষ্ট্ৰীয় সভাপতি হৈছিল ৰাজনাথ। বৰ্তমান বিজেপিৰ পৰৱৰ্তী ৰাষ্ট্ৰীয় সভাপতি পদৰ বাবে ৰাজনাথৰ ওপৰিও RSS য়ে নাম প্ৰস্তাৱ কৰিছে আন কেইবাজনো নেতাৰ। 
পৰৱৰ্তী সভাপতি হিচাপে RSS য়ে প্ৰস্তাৱ কৰিছে মনোহৰ লাল খট্টৰ,নীতিন গাডকাৰী,মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফাড়নবিছৰ নাম। RSS ৰ বিপৰীতে বিজেপিৰ হাইকামাণ্ডে নাড্ডাৰ উত্তৰসূৰী হিচাপে প্ৰস্তাৱ কৰিছে ভূপেন্দ্ৰ যাদৱ আৰু ধৰ্মেন্দ্ৰ প্ৰধানৰ নাম। সকলো ঠিকেই থাকিলে জুলাই মাহৰ মাজ ভাগত বিজেপিৰ কাৰ্যকৰ্তাই লাভ কৰিব নাড্ডাৰ উত্তৰসূৰী। 

Share This Article
Leave a Comment

Leave a Reply

Your email address will not be published. Required fields are marked *