ডিমৌ-নিতাইপুখুৰীত দিনদুপৰতে দুৰ্বৃত্তই লুটি নিলে ১০ লক্ষাধিক টকা। বেটাৰী ৰিক্সাত বিপুল দত্ত নামৰ শিৱসাগৰৰ ডাকঘৰৰ কেছ বিষয়াজনে শিৱসাগৰৰ পৰা নিতাইপুখুৰী ডাকঘৰলৈ বুলি নি আছিল ১০ লক্ষাধিক টকা। ডাকঘৰৰ কৰ্মচাৰী জনৰ লগত শিৱসাগৰৰ পৰা ডিমৌলৈ যোৱা নাছিল কোনো সুৰক্ষা কৰ্মীৰ লোক। ডিমৌৰ পৰা নিতাইপুখুৰীস্থিত ডাকঘৰৰ অভিমুখে বেটেৰী ৰিক্সাৰে গৈ থকা সময়তে বিপুল দত্তক ডিমৌৰ সমীপৰ ৰাইচাইত কলা ৰঙৰ বাজাজ পালচাৰত অহা দুই দুৰ্বৃত্তই মাৰপিত কৰি কাঢ়ি লৈ যায় টকা ভৰ্তি বেগটো।
উল্লেখযোগ্য যে ডাকঘৰৰ কেছ বিষয়া বিপুল দত্তই পূৰ্বেও এনেদৰে নগদ ধন জিলাখনৰ বিভিন্ন ডাকঘৰত দিয়াৰ ব্যৱস্থা কৰে কিন্তু আনদিনাৰ দৰে আজি বিপুল দত্তৰ লগত নাছিল কোনো সুৰক্ষা কৰ্মী। বিপুল দত্তৰ লগত ডাকঘৰৰ উৰ্দ্ধতন কতৃপক্ষই কোনো সুৰক্ষা কৰ্মী নপঠোৱাৰ ফলতেই এই অনাকাংক্ষিত ঘটনা সংঘটিত হয়। কি পৰিস্থিতিত শিৱসাগৰ জিলা ডাকঘৰৰ উৰ্দ্ধতম কতৃপক্ষই কোনো সুৰক্ষা ব্যৱস্থা গ্ৰহণ নকৰাকৈ প্ৰায় ত্ৰিশ কিলোমিটাৰ দূৰত্বৰ এটা পথত ইমান ডাঙৰ অংকৰ ধন কেৱল এজন ব্যক্তিৰ হাতত সৰবৰাহ কৰিছিল সেয়া এক বিচাৰ্যৰ বিষয়। বৰ্তমান ঘটনাস্থলীত নিতাইপুখুৰী আৰক্ষী উপস্থিত হৈ আৰম্ভ কৰিছে তদন্ত।
