যোৰহাটৰ জানখনা গাঁৱত সংঘটিত হৈছে এক শোকাৱহ ঘটনা। জাপানীজ এনকেফেলাইটিছত ৰোগত মৃত্যু এটি কিশোৰৰ ।ৰক্তিম দাস নামৰ কিশোৰজনে জাপানীজ এনকেফেলাইটিছত আক্ৰান্ত হৈ যোৰহাট চিকিৎসা মহাবিদ্যালয়ত ৮ দিন ধৰি চিকিৎসাধীন অৱস্থাত থকাৰ পাছতো, অৱশেষত মৃত্যুক আঁকোৱালি লয়।
এই সন্দৰ্ভত যোৰহাট মেলেৰিয়া বিভাগৰ ভাৰপ্ৰাপ্ত বিষয়া কবিতা ভূঞাই সংবাদমাধ্যমক জনায় যে “জাপানীজ এনকেফেলাইটিছৰ প্ৰাদুৰ্ভাৱ জিলাখনত বৰ্তমান নিয়ন্ত্ৰণত আছে।
জানুৱাৰী মাহৰ পৰা জুন মাহলৈকে যোৰহাট জিলাত মুঠ ৯ জন এই ভাইৰেল ৰোগত আক্ৰান্ত হৈছে। ইয়াৰে ৫ জন বৰ্তমান যোৰহাট চিকিৎসা মহাবিদ্যালয় আৰু মিছন হাস্পতালত চিকিৎসাধীন হৈ আছে। আক্ৰান্তসকলৰ ভিতৰত শিশুও আছে। এতিয়ালৈকে এই ৰোগত এজন কিশোৰৰ মৃত্যু হৈছে।
উল্লেখযোগ্য যে, জাপানীজ এনকেফেলাইটিছ এক সংক্ৰমণজনিত ভাইৰেল ৰোগ, যি প্ৰধানকৈ মহে কামোৰৰ ফলতে সংক্রমিত হয়। স্বাস্থ্য বিভাগে ইতিমধ্যে জিলা খনত সচেতনতামূলক অভিযান আৰম্ভ কৰিছে বুলি জানিব পৰা গৈছে।
