গোৱালপাৰা পৌৰসভাৰ সভাপতি মহানন্দ পাঠকৰ বিৰুদ্ধে যৌন নিৰ্যাতনৰ ভয়ংকৰ অভিযোগ।
অশ্লীল প্ৰস্তাৱ মানি নোলোৱা বাবেই কাৰ্যালয়ৰ ভিতৰতে মহিলা কৰ্মচাৰীক ধৰ্ষণৰ অপ্ৰচেষ্টা,কামৰ পৰা দিলে উলিয়াই।আৰক্ষী থানাত দাখিল কৰা এজাহাৰ প্ৰত্যাহাৰৰ বাবে গুন্দাবাহিনীৰ তীব্ৰ হেচা।
অশ্লীল প্ৰস্তাৱ মানি নোলোৱা বাবেই নিজ কাৰ্যালয়ৰ এগৰাকী মহিলাক ধৰ্ষণৰ অপচেষ্টা কৰি বিবস্ত্ৰ কৰি যৌন নিৰ্যাতন চলোৱাৰ লগতে মহিলাগৰাকীক কামৰ পৰা অবৈধভাৱে উলিয়াই দিয়াৰ এক গুৰুতৰ অভিযোগ উত্থাপিত হৈছে বিজেপি দলৰ দখলত থকা গোৱালপাৰা পৌৰসভাৰ বিতৰ্কিত সভাপতি মহানন্দ পাঠকৰ বিৰুদ্ধে। ভুক্তভোগী মহিলাগৰাকীয়ে কালি এই সন্দৰ্ভত গোৱালপাৰা সদৰ আৰক্ষী থানাত এখন এজাহাৰ দাখিল কৰিছে।এজাহাৰত অভিযোগ উত্থাপন কৰা অনুসৰি পৌৰসভাৰ সভাপতি মহানন্দ পাঠকে দীৰ্ঘদিন ধৰি তেওঁক যৌন নিৰ্যাতন,শাৰীৰিক উৎপীড়ন আৰু কৰ্মস্থলীত বিভিন্ন প্ৰকাৰে ভাবুকি দি আহিছে।এনেকি সভাপতি গৰাকীয়ে কাৰ্যালয় চলি থকা অৱস্থাত ইচ্ছাকৃতভাৱে মহিলাগৰাকীৰ শৰীৰৰ আপত্তিজনক অংগত স্পৰ্শ কৰি অশ্লীল ইংগিত দিয়াৰ লগতে নিশা ১১–১২ বজাত মহিলা গৰাকীৰ ম'বাইল ফোন যোগে নৈশ যাপনৰ বাবে হেঁচা প্ৰয়োগ কৰি নিৰ্যাতন চলাই আহিছে পৌৰপতি মহানন্দ পাঠকে। ইয়াতে ক্ষান্ত নাথাকি যোৱা ১৮ জুনত মহানন্দ পাঠকে নিজ কাৰ্যালয়ৰ কক্ষত মহিলা কৰ্মচাৰী গৰাকীক মাতি নি তেওঁৰ লগত বাহিৰলৈ ২/৩ দিনৰ বাবে ফুৰিব যোৱাৰ অশ্লীল প্ৰস্তাৱ দিয়ে। সভাপতিগৰাকীৰ এই অবৈধ আৰু অশ্লীল প্ৰস্তাৱত মান্তি নোহোৱাত কামৰ পৰা উলিয়াই দিয়াৰ ভাবুকি দি মহিলাগৰাকীক কাৰ্যালয়ৰ ভিতৰতে ধৰ্ষণৰ অপচেষ্টা কৰি মহিলাগৰাকীক বিবস্ত্ৰ কৰে। অৱশেষত মহিলাগৰাকীয়ে চিঞৰিব ধৰোতেহে মহিলাগৰাকীক এৰি দিয়ে বুলি এজাহাৰত ভয়ংকৰ অভিযোগ উত্থাপন কৰা হৈছে।নিৰ্যাতিত মহিলাগৰাকীয়ে এজাহাৰত উল্লেখ কৰা মতে, তেওঁ ২০১৬ চনৰ পৰা NULM ৰ CRP হিচাপে কাম কৰি অকলশৰে ৰুগীয়া স্বামী আৰু দুটি সন্তানৰ পৰিয়ালক পোহপাল দি আহিছে। কিন্তু মহানন্দ পাঠকৰ অশ্লীল আৰু অবৈধ প্ৰস্তাৱ মানি নোলোৱা বাবেই তেওঁক ইতিমধ্য কামৰ পৰা অবৈধভাৱে আঁতৰোৱা হৈছে বুলি মহিলাগৰাকীয়ে গুৰুতৰ উভিযোগ উত্থাপন কৰিছে।তাৎপৰ্যপূৰ্ণ বিষয় যে ভুক্তভোগী মহিলাগৰাকীয়ে সভাপতি মহানন্দ পাঠকৰ এই সমগ্ৰ কৰ্ম-কাণ্ডৰ বিষয়ে গোৱালপাৰা পৌৰসভাৰ কাৰ্যবাহী বিষয়াক অৱগত কৰি নিৰাপত্তা বিচাৰে। কিন্তু কাৰ্যবাহী বিষয়াগৰাকীয়ে আজিলৈকে কোনো পদক্ষেপ লোৱা নাই।তেনেদৰে ২৩ জুনত বিজেপি দলৰ ৰাজ্যিক সাধাৰণ সম্পাদক দিল্পু ৰঞ্জন শৰ্মা আৰু গোৱালপাৰা জিলা বিজেপিৰ সভিপতিকো সমগ্ৰ ঘটনাৰ বিৱৰণ দি লিখিত অভিযোগ দাখিল কৰিছিল। কিন্তু সংশ্লিষ্ট কোনো এজনে মহিলাগৰাকীৰ অভিযোগক গুৰুত্ব প্ৰদান নকৰি মহানন্দ পাঠকক গুন্দামী কৰিবলৈ মুক্ত লাইচেন্স প্ৰদান কৰে। অৱশেষত উপায়হীন হৈ মহিলাগৰাকীয়ে কালি গোৱালপাৰা সদৰ আৰক্ষী থানাত এজাহাৰ দাখিল কৰিবলৈ বাধ্য হয় বুলি এজাহাৰত স্পষ্টভাৱে উল্লেখ কৰিছে।ইপিনে এজাহাৰ দাখিলৰ পিচতে মহানন্দ পাঠকৰ গুন্দাবাহিনীয়ে মহিলাগৰাকীয়ে সদৰ থানাত দাখিল কৰা এজাহাৰখন প্ৰত্যাহাৰ কৰিবলৈ তীব্ৰ হেচা দিয়া বুলিও অভিযোগ উত্থাপিত হৈছে।
