বিদেশী পৰ্যটকৰ কোলাহলত উদুলি মুদুলি বগামাটি। চুবুৰীয়া ভূটান পাহাৰৰ পৰা নামি আহি বগামাটিত প্ৰাণ জুৰোৱাৰ প্ৰয়াস।
অসমৰ শীতল শোভাৰে প্ৰকৃতিক আলিংগন এজাক ভূটানীৰ, নৈসৰ্গিক প্ৰকৃতিৰ কোলাত পাতিছে ৰোমাঞ্চকৰ ক্ৰীড়াংগন।
প্ৰচণ্ড গৰমে দহিছে ৰাজ্য। আহাৰ মহীয়া উত্তাপৰ মাজতে চুবুৰীয়া দেশ ভূটানৰ লোকে আহি আনন্দ কৰিছে গোৰেশ্বৰৰ বগামাটিত। দুঃসাহসিক পৰ্যটন স্থলী হিচাপে প্ৰতিষ্ঠিত অসমৰ অন্যতম প্ৰকৃতিৰ ৰম্যভূমি বগামাটি এতিয়া এনেদৰেই উদুলি মুদুলি।
বছৰটোৰ প্ৰতিটো দিনতেই পৰ্যটকৰ বাবে খোলা থকা বগামাটিত যিকোনো সময়তে আহি ভিৰ কৰেহি বিভিন্ন প্ৰান্তৰৰ প্ৰকৃতিপ্ৰেমী লোকে। বিশেষকৈ হোৱাইট ওৱাটাৰ ৰাফ্টিংৰ বাবে অতিকৈ জনপ্ৰিয় হৈ পৰা বগামাটিত জুন মাহৰ পৰা প্ৰতি বছৰে আৰাম্ভ হয় এই দুঃসাহসিক ক্ৰীড়া। এইবেলিও ৰাফ্টিং আৰম্ভ হোৱাৰ লগে লগে ভিৰ কৰিছে দেশী বিদেশী পৰ্যটকে। আমেজ লৈছে প্ৰকৃতিৰ কোলাত দুঃসাহসিক ক্ৰীড়াৰ।
হিমালয়ৰ পৰা প্ৰকৃতি ৰাণী বাগামাতিৰ মাজেৰে বৈ অহা বৰনদীৰ চেঁচা পানীৰ সোঁতত ৰাফ্টিংৰ আমেজ লবলৈ নামি আহিছে চুবুৰীয়া ৰাষ্ট্ৰ ভূটানৰ পৰ্যটক। বৰনদীত ৰাফ্টিং কৰি এনেদৰেই আনন্দত আত্মহাৰা হৈ পৰিছে ভূটানী পৰ্যটকসকল।উছাহমুখৰ পৰিৱেশৰ মাজত আটাইৰে মুখত একেই কথা, ভূটান আৰু ভাৰতৰ লোকসকলৰ বাবে দুঃসাহসিক ক্ৰীড়াৰ বাবে অতি সুচল ঠাই এই বগামাটি।
পৰ্যটকৰ দলটোৱে বগামাটিৰ গ্ৰীণ ট্ৰেক এণ্ড এডভেঞ্চাৰৰ বগামাটি ইকো কেম্পত নৈশ যাপন কৰাৰ লগতে জিপলাইন, ট্ৰেকিঙৰ উপৰিও বিভিন্ন দুঃসাহসিক ক্ৰীড়াৰ আমেজ লৈ আত্মহাৰা হৈ পৰা দেখা গ'ল প্ৰকৃতিৰ নৈসৰ্গিক পৰিৱেশত। গ্ৰীষ্মৰ প্ৰচণ্ড উত্তাপত এতিয়া যেন শীতল সান্নিধ্যৰ বাবে বগামাটিয়ে হাতবাউলি মাতিছে সকলোকে।।
