বিহাৰৰ পাছত অসমতো ভোটাৰ তালিকাৰ পৰাও কৰ্তন হ'ব পাৰে লাখ লাখ ভোটাৰৰ নাম। ২৬ ৰ বিধানসভা নিৰ্বাচনৰ পূৰ্বে অসমত ভোটাৰ তালিকা সংশোধনৰ ইংগিত দিলে মুখ্যমন্ত্ৰী হিমন্ত বিশ্ব শৰ্মাই।
ইতিমধ্যে বিহাৰত ভোটাৰ তালিকাৰ পৰা বাদ পৰিছে ৩৫ লাখ ভোটাৰৰ নাম। গোৱালপাৰা আৰু ধুবুৰীত প্ৰশাসনে উচ্ছেদ চলোৱা উচ্ছেদিতৰ নাম ভোটাৰ তালিকাৰ পৰা কৰ্তন কৰা হ'ব! উচ্ছেদিতৰ নাম ভোটাৰ তালিকাৰ পৰা কৰ্তন কৰিবলৈ গোৱালপাৰা আৰু ধুবুৰীৰ জিলা আয়ুক্তই পদক্ষেপ গ্ৰহণ কৰিছে!মঙলবাৰে সংবাদমেল যোগে এই দাবী কৰিলে মুখ্যমন্ত্ৰী হিমন্ত বিশ্ব শৰ্মাই।
পাইকান সংৰক্ষিত বনাঞ্চলৰ ১৪০ হেক্টৰ ভূমি বেলদখল কৰিবলৈ ১,০৮০টা পৰিয়ালক উচ্ছেদ কৰিছে প্ৰশাসনে। একেদৰে ধুবুৰী জিলাটো ৩,৫০০ বিঘা চৰকাৰী ভূমিৰ পৰা উচ্ছেদ কৰা হৈছিল ১,০৬৯ টা পৰিয়ালক। এতিয়া কথা হ'ল মুখ্যমন্ত্ৰীয়ে কোৱাৰ দৰেই,এই ২,১৪৯ টা পৰিয়ালৰ সদস্যৰ নাম কৰ্তন কৰা হ'ব নেকি ভোটাৰ তালিকাৰ পৰা ?
সংখ্যালঘু অঞ্চলৰ লোকৰ ভোটাৰৰ নাম ভোটাৰ তালিকাৰ পৰা কৰ্তন কৰি ২৬ লৈ কংগ্ৰেছৰ কামিহাড় ভাঙিব নেকি মুখ্যমন্ত্ৰীয়ে ?
বিগত বৰ্ষত অসমত ১.২ লাখ 'ডি ভোটাৰ' থকাৰ তথ্য বিধানসভাত এক লিখিত প্ৰশ্নোত্তৰত সদৰী কৰিছিল মুখ্যমন্ত্ৰী হিমন্ত বিশ্ব শৰ্মাই।
অসমত থকা ১.২ লাখ 'ডি ভোটাৰ'ৰ ভিতৰত ৪১,৫৮৩ গৰাকীক বিদেশী বুলি চিনাক্ত কৰা হৈছিল। উচ্ছেদিত ভূমি মানুহৰ ভোটাধিকাৰ কৰ্তন কৰিম বুলি মুখ্যমন্ত্ৰীয়ে সংবিধানৰ বিৰোধিতা কৰাৰ অভিযোগ অখিল গগৈৰ।
