ৰাষ্ট্ৰপতি শাসন বৃদ্ধি কৰাৰ সম্ভাৱনা আছে মণিপুৰত। আগন্তুক ৬ মাহৰ বাবে মণিপুৰত বৃদ্ধি পাব পাৰে ৰাষ্ট্ৰপতি শাসন। চলিত বৰ্ষৰ ১৩ আগষ্টত মণিপুৰত ম্যাদ শেষ হ'ব ৰাষ্ট্ৰপতি শাসনৰ। ২০২৬ বৰ্ষৰ ফেব্ৰুৱাৰী মাহ পৰ্যন্ত মণিপুৰত বলৱৎ থাকিব পাৰে ৰাষ্ট্ৰপতি শাসন।
উল্লেখযোগ্য যে,চলিত বৰ্ষৰ ১৩ ফেব্ৰুৱাৰীৰ পৰা মণিপুৰত বলৱৎ হৈ আছে ৰাষ্ট্ৰপতি শাসন। ৯ ফেব্ৰুৱাৰীত গোষ্ঠীগত সংঘৰ্ষ প্ৰতিৰোধত ব্যৰ্থ হোৱাৰ বাবে পদত্যাগ কৰিছিল মণিপুৰৰ মুখ্যমন্ত্ৰী এন বীৰেন সিঙে। সংঘৰ্ষপীড়িত ৰাজ্যখনৰ মুখ্যমন্ত্ৰীগৰাকীয়ে পদত্যাগ কৰাৰ পাছতেই পৰৱৰ্তী মুখ্যমন্ত্ৰী কোন হ’ব তাকে লৈ চলিছিল জল্পনা-কল্পনা। কিন্তু মুখ্যমন্ত্ৰী গৰাকীৰ পদত্যাগৰ চাৰিদিন উকলি যোৱাৰ পাছতো মণিপুৰ বিজেপিয়ে ঘোষণা কৰিব পৰা নাছিল পৰৱৰ্তী মুখ্যমন্ত্ৰীৰ নাম। যাৰফলত চলিত বৰ্ষৰ ১৩ ফেব্ৰুৱাৰীৰ পৰা মণিপুৰত বলবৎ হৈ আছে ৰাষ্ট্ৰপতি শাসন। মণিপুৰত ৰাষ্ট্ৰপতিৰ শাসন বৃদ্ধি কৰাৰ বাবে সংসদত প্রস্তাৱ গ্ৰহণ কৰাৰ সম্ভাৱনা আছে।
২১ জুলাইৰ পৰা আৰম্ভ হ'ব সংসদৰ শীতকালীন অধিৱেশন। উল্লেখযোগ্য যে,মণিপুৰত বিজেপিৰ পৰৱৰ্তী মুখ্যমন্ত্ৰী নিৰ্বাচন কৰাত অসুবিধাৰ সন্মুখীন হৈছিল হাইকামাণ্ড। কাৰণ কেইবাটাও লবীত বিভক্ত হৈ পৰিছিল মণিপুৰ বিজেপি বিধায়ক সকল।
