লখিমপুৰৰ উচ্ছেদিত খিলঞ্জীয়া পৰিয়ালৰ বাবে 'গুড নিউজ' দিলে মুখ্যমন্ত্ৰীয়ে। লখিমপুৰত প্ৰশাসনে উচ্ছেদ কৰা ১১টা খিলঞ্জীয়া পৰিয়ালক ভূমি দিব ৰাজ্য চৰকাৰে। অহা ৩১ জুলাইৰ ভিতৰত লখিমপুৰৰ উচ্ছেদিত খিলঞ্জীয়া পৰিয়ালক ভূমি প্ৰদান কৰিব ৰাজ্য চৰকাৰে। লখিমপুৰৰ উচ্ছেদিত ১১টা পৰিয়ালক ১ কঠা ৫ লেচাকৈ ভূমি প্ৰদান কৰিব ৰাজ্য চৰকাৰে। শুকুৰবাৰে ৰাজ্যিক কেবিনেটত বৈঠকৰ পাছত সংবাদমেল যোগে এই গুৰুত্বপূৰ্ণ ঘোষণা কৰে মুখ্যমন্ত্ৰীয়ে।
লখিমপুৰ ৰাজহ চক্ৰৰ ভিতৰত প্ৰিমিয়াম অবিহনে খিলঞ্জীয়া পৰিয়ালকেইটাক ভূমি দিয়াৰ সিদ্ধান্ত চৰকাৰৰ। আনহাতে,মিছন বসুন্ধৰাৰ জৰিয়তে ৪ হাজাৰৰো অধিকক লোকক মাটিৰ পট্টা প্ৰদান কৰিব ৰাজ্য চৰকাৰে। ৩১ জুলাইৰ ভিতৰত ভূমিৰ পট্টা লাভ কৰিব পাৰে ৪ হাজাৰ লোকে।
আনহাতে,একাংশ মিঞা লোকে ধিং, লাহৰীঘাটৰ পৰা আহি উৰিয়ামঘাটত চৰকাৰী মাটি দখল কৰাৰ দাবী মুখ্যমন্ত্ৰীৰ। উৰিয়ামঘাটত ৩ হাজাৰ বিঘা বনাঞ্চলৰ ভূমি বেদখলকাৰীৰ কৱলত পৰিছে বুলি দাবী কৰিলে মুখ্যমন্ত্ৰীয়ে। শীঘ্ৰেই উৰিয়ামঘাটত উচ্ছেদ চলিব বুলি সংবাদমেলত উল্লেখ কৰিলে মুখ্যমন্ত্ৰী হিমন্ত বিশ্ব শৰ্মাই।
