ট্ৰাম্পক সন্তুষ্ট কৰাৰ কৌশল? দুটা সামগ্ৰী আমেৰিকাৰ পৰা অধিক দামত ক্ৰয় কৰিবলৈ সাজু বাংলাদেশ

আমেৰিকাৰ ৰাষ্ট্ৰপতি ডোনাল্ড ট্ৰাম্পক সন্তুষ্ট কৰিবলৈ নতুন কৌশল গ্ৰহণ কৰিছে বাংলাদেশে। অন্ততঃ দুইবিধ সামগ্ৰী বেছি দামত আমেৰিকাৰ পৰা কিনাৰ পৰিকল্পনা কৰিছে বাংলাদেশে। বাংলাদেশেৰ সংবাদ মাধ্যমৰ খবৰ অনুসৰি, বৃহস্পতিবাৰে ঢাকাৰ সচিবালয়ত মুহাম্মদ ইউনূছৰ অন্তর্বর্তীকালীন চৰকাৰৰ  খাদ্য সচিব মাচুদুল হাচানৰ নেতৃত্বত আয়োজন কৰা বৈঠকত এই সিদ্ধান্ত গ্ৰহণ কৰা হৈছে। শুল্ক কমোৱাৰ আশাত গম আৰু বিমান বেছি দামত আমেৰিকাৰ পৰা কিনিব পাৰে বাংলাদেশ।
বাংলাদেশী সামগ্ৰী সাধাৰণতে আমেৰিকাত ১৫ শতাংশ কৰত ৰপ্তানি কৰা হয়। কিন্তু ট্ৰাম্পৰ ক্ষমতালাভৰ পাছত চলিত এপ্ৰিল মাহত বিভিন্ন দেশৰ ওপৰত পাৰস্পৰিক কৰ আৰোপ কৰে। বাংলাদেশৰ সামগ্ৰীৰ ওপৰত চাপ পৰে ৩৭ শতাংশ আৰু ইয়াৰ ফলস্বৰূপ আমেৰিকাই ধাৰ্য কৰা কৰ পৰিমাণ ৫২ শতাংশ। যদিও তিনিমাহৰ বাবে এই কৰ স্থগিত ৰাখিছে ট্ৰাম্প। এই তিনিমাহত বিভিন্ন দেশৰ সৈতে বাণিজ্যৰ বিষয়ে আমেৰিকাই দৰ-দাম চলাই আছে। বাংলাদেশও কৰ হ্ৰাসৰ চেষ্টা কৰি আছে।
বাংলাদেশৰ সংবাদ মাধ্যেমৰ খবৰ অনুসৰি, বুধবাৰৰ বৈঠকত সিদ্ধান্ত লৈছে যে, আমেৰিকা সৈতে চৰকাৰৰ পৰা চৰকাৰ পৰ্যায়ত (গভৰ্ণমেণ্ট টু গভৰ্ণমেণ্ট বা জিটিজি) তিন লাখ টন গম আমদানি কৰা হ'ব। সাধাৰণতে যি দামত অন্য ঠাইৰ পৰা গম কিনা হয়, তাতোকৈ অধিক দামত ক্ৰয় কৰিব আমেৰিকাৰ পৰা। লগতে আমেৰিকাৰ বোৱিং প্ৰতিষ্ঠানৰ পৰা বিমান কিনাৰ সিদ্ধান্তও লোৱা হৈছে। ইয়াৰ জড়িয়তে, আমেৰিকাৰ পৰা আমদানি প্ৰক্ৰিয়া সহজ কৰিব পাৰে ঢাকা। এই সকলো বিষয়ক লৈ বৰ্তমানও চূড়ান্ত সিদ্ধান্ত লোৱা নাই। বিষয়টো আলোচনাৰ পৰ্য্যায়ত আছে। অহা ২৯ জুনত আমেৰিকাৰ সৈতে আলোচনা কৰাৰ পিছত শুল্কৰ নতুন হাৰ নিৰ্ধাৰিত হ'ব পাৰে।
বাংলাদেশে সাধাৰণতে গম ৰাছিয়া আৰু ইউক্ৰেনৰ পৰা আমদানি কৰে। এই দুই দেশৰ গমৰ দাম তুলনামূলকভাবে কম। যদি আমেৰিকাৰ পৰা গম ক্ৰয় কৰা হয়, তেন্তে বাংলাদেশে প্ৰতি টনত ২০ পৰা ২৫ ডলাৰ বেছি দামত ক্ৰয় কৰিব লাগিব। ভাৰতীয় মুদ্ৰাত যিটো ১৭০০ পৰা ২১০০ টকাৰ সমান। কিন্তু ৰাছিয়া আৰু ইউক্ৰেনৰ গমৰ তুলনাত আমেৰিকা যুক্তৰাষ্ট্রৰ গমৰ খাদ্যমান উন্নত। বাংলাদেশৰ কৰ্মকর্তাসকলৰ মতে, শুল্ক আৰু বাণিজ্যৰ ক্ষেত্ৰত আমেৰিকাৰ সৈতে বাংলাদেশৰ আলোচনা ইতিবাচক পৰ্যায়ত আছে। শীঘ্ৰে তাৰ সুফল পোৱাৰ সম্ভাৱনা আছে।

Share This Article
Leave a Comment

Leave a Reply

Your email address will not be published. Required fields are marked *