চৰকাৰ আহে আৰু যায় , পৰিৱৰ্তন হয় জনপ্ৰতিনিধি , নেতা-পালিনেতাৰ । পিছে পৰিৱৰ্তন নহয় সাধাৰণ জনতাৰ সমস্যা আৰু দুৰৱস্থা । ভূটান পাহাৰৰ পৰা বৈ অহা শুক্লাই নৈ , বাৰিষা নদীৰ বাবে বহিঃ বিশ্বৰ সৈতে সংযোগ বিচ্ছিন্ন হৈ পৰে এটা অঞ্চল । প্ৰতি বছৰে বাৰিষাৰ সময়ত মূৰে-কপালে হাত দিব লাগে পথচাৰী কিম্বা সাধাৰণ জনতাই। খৰস্ৰোতা শুক্লাই নৈৰ বুকুত ঘণ্টা-ঘণ্টা ধৰি আৱদ্ধ হৈ পৰে ছাত্ৰ-ছাত্ৰী, ব্যৱসায়ী , শ্ৰমিক লোক । আনকি বহুসময়ত ছাত্ৰ-ছাত্ৰী, ক্ষুদ্ৰ ব্যৱসায়ী নৈৰ বুকুত উটি যোৱাও উদাহৰণ আছে । পৰীক্ষা দিব নোৱাৰে বিদ্যালয়ৰ ছাত্ৰ-ছাত্ৰীয়ে, সময়মতে উপস্থিত হ'ব নোৱাৰে বিদ্যালয়ত ।নিৰ্বাচনৰ প্ৰাক মুহূৰ্তত জনপ্ৰতিনিধিৰ পৰিৱৰ্তনৰ নামত ফুলঝাৰি মাৰা ভাষণ দিয়ে জন নেতাই। পিছে নিৰ্বাচন শেষ হ'লে পাহৰি যায় সকলো প্ৰতিশ্ৰুতি ।
বিটিআৰ প্ৰধানৰ সপোনৰ ছুইজাৰলেণ্ডত এতিয়া উন্নয়নৰ পয়ালগা ছবিয়ে হতভম্ব কৰি তুলিছে সর্বসাধাৰণ ৰাইজক। বিটিআৰৰ বিভিন্ন প্ৰান্তত জৰাজীৰ্ণ পথ, দলং আদিয়ে জ্বলা-কলা খুৱাইছে পথচাৰীক । ওদালগুৰিত উন্নয়নৰ নামত ফোঁপোলা স্বৰূপ । ইউপিপিএল নেতৃত্বাধীন চৰকাৰে মাথোঁ লুণ্ঠন আৰু দুর্নীতিৰে উদঙাইছে উন্নয়নৰ ফোঁপোলা স্বৰূপ । ভূটান সীমান্তত এখন দলংৰ অভাৱত কিদৰে যাতায়ত কৰিব লাগে দেখিলে চকু কপালত উঠিব আপোনাৰো । মুখ্যমন্ত্ৰীয়ে বাৰে বাৰে কৈ আহিছে ভাৰতবৰ্ষৰ ভিতৰত শ্ৰেষ্ঠ ৰাজ্য হৈছে অসম । গুৱাহাটী মহানগৰীত জধে-মধে উৰণীয়া সেঁতু নিৰ্মাণ কৰি আহিছে চৰকাৰে , কিন্তু ভূটান সীমান্তত এখন দলংৰ অভাৱত কেইবাখনো গাঁৱৰ যাতায়ত ব্যাহত হৈ পৰে বাৰিষা কালত। যাতায়াত ব্যবস্থাৰ বাবে পানীত হাঁহ নচৰা অৱস্থা হৈ পৰে ছাত্ৰ-ছাত্ৰী পথচাৰীৰ। সকলোৰে আশা আছিল হাগ্ৰামাৰ ১৭ বছৰীয়া শাসনক উফৰাই ইউপিপিএল আৰু বিজেপিৰ মৃতযোঁজিত চৰকাৰে পূর্ণ পৰিৱৰ্তন আনিব বুলি , কিন্তু সেয়া বাস্তৱত হৈ নুঠিল । সময়ৰ লগে লগে ভিতৰুৱা অঞ্চলসমূহৰ যাতায়াত, যোগাযোগ ব্যৱস্থা পূর্বতকৈও অধিক অৱনতিহে ঘটিল। ডিমাকুছি-বাদলাপাৰা, টেংকীবস্তী সংযোগী পথৰ শুক্লাই নদীত দীর্ঘদিনে এখন দলংৰ অভাৱ । সেয়ে এইবাৰ BTC নিৰ্বাচনৰ পূৰ্বে শুক্লাই নদীত দলং নিৰ্মাণ নকৰিলে, জনপ্ৰতিনিধিক উচিত শিক্ষা দিবলৈ সাজু হোৱাৰ লগতে ভোট বৰ্জন কৰাৰ সিদ্ধান্ত দুৰ্ভগীয়া জনতাৰ ।
