নতুন দিল্লী, ৩০ অক্টোবৰ: বিহাৰৰ প্ৰাক্তন JD(U) বিধায়ক অনন্ত সিঙৰ জামিন বাতিল কৰিছে উচ্চতম ন্যায়ালয়ে। ডুলাৰচান্দ যাদৱ হত্যাকাণ্ডৰ গোচৰত ১ ডিচেম্বৰৰ ভিতৰত কৰ্তৃপক্ষৰ ওচৰত আত্মসমৰ্পণ কৰিবলৈ মকামাৰ বিধায়কগৰাকীক নিৰ্দেশ দিছে শীৰ্ষ আদালতে।
ন্যায়াধীশ এম এম সুন্দ্ৰেশ আৰু ন্যায়াধীশ প্ৰসন্ন বি বৰালেৰে গঠিত বিচাৰপীঠে শুকুৰবাৰে এই নিৰ্দেশ দিয়ে। একে সময়তে বিহাৰ আৰক্ষীক হত্যাকাণ্ডৰ তদন্ত পৰৱৰ্তী চাৰি মাহৰ ভিতৰত সম্পূৰ্ণ কৰিবলৈ নিৰ্দেশ দিছে আদালতে। চাৰি মাহৰ পিছত গোচৰটোৰ পৰৱৰ্তী শুনানিৰ দিন ধাৰ্য কৰা হৈছে।
ডুলাৰচান্দ যাদৱৰ নাতি নীৰজ কুমাৰে পাটনা উচ্চ ন্যায়ালয়ৰ জামিনৰ নিৰ্দেশক প্ৰত্যাহ্বান জনাই উচ্চতম ন্যায়ালয়ত আবেদন দাখিল কৰিছিল। চলিত বৰ্ষৰ ১৯ মাৰ্চত পাটনা উচ্চ ন্যায়ালয়ে অনন্ত সিঙক জামিন প্ৰদান কৰিছিল।
উচ্চতম ন্যায়ালয়ে জামিন প্ৰদানৰ সময়ত অপৰাধৰ গুৰুত্ব আৰু অভিযুক্তৰ পূৰ্বৰ অপৰাধমূলক গোচৰৰ তথ্য যথাযথভাৱে বিবেচনা কৰা হোৱা নাছিল বুলি পাটনা উচ্চ ন্যায়ালয়ৰ সিদ্ধান্তক লৈ প্ৰশ্ন উত্থাপন কৰে।
উল্লেখ্য যে, ২০২৫ চনৰ ৩০ অক্টোবৰত বিহাৰ বিধানসভা নিৰ্বাচনৰ প্ৰচাৰ চলি থকাৰ সময়তে মকামাত ডুলাৰচান্দ যাদৱক হত্যা কৰা হৈছিল। সেই ঘটনাৰ সৈতে জড়িত থকাৰ অভিযোগত অনন্ত সিঙক ২০২৫ চনৰ ১ নৱেম্বৰত গ্ৰেপ্তাৰ কৰা হৈছিল। তেওঁ এই গোচৰত অভিযুক্ত, অৱশ্যে হত্যাকাণ্ডৰ অভিযোগ আদালতত এতিয়াও প্ৰমাণিত হোৱা নাই।
ইফালে, দলবিৰোধী কাৰ্যকলাপৰ অভিযোগত JD(U)-এ ২৪ অক্টোবৰত অনন্ত সিং আৰু তেওঁৰ পত্নী তথা প্ৰাক্তন বিধায়িকা নীলম দেৱীক ছয় বছৰৰ বাবে দলৰ পৰা বহিষ্কাৰ কৰিছিল।
