নতুন দিল্লী, ২৮ অক্টোবৰঃ দিল্লীত প্ৰতিবাদৰ ফলত সাধাৰণ নাগৰিকৰ অসুবিধা আৰু জনজীৱনত হোৱা ব্যাঘাতৰ অভিযোগ উত্থাপন কৰি ‘ককৰোচ জনতা পাৰ্টি’ৰ (Cockroach Janata Party) বিৰুদ্ধে ৫০ কোটি টকাৰ অন্তৱৰ্তীকালীন ক্ষতিপূৰণ বিচাৰি দাখিল কৰা ৰাজহুৱা স্বাৰ্থজড়িত আবেদন গ্ৰহণ কৰিবলৈ অস্বীকাৰ কৰিছে দিল্লী উচ্চ ন্যায়ালয়ে। একে বিষয়ক লৈ ইতিমধ্যে উচ্চতম ন্যায়ালয়ত একাধিক গোচৰ বিচাৰাধীন হৈ থকাৰ কথা উল্লেখ কৰি আবেদনকাৰীক উচ্চতম ন্যায়ালয়ৰ কাষ চাপিবলৈ পৰামৰ্শ দিছে আদালতে।
বুধবাৰে ভাৰপ্ৰাপ্ত মুখ্য ন্যায়াধীশ নীতিন ৱাছুদেৱ সাম্ব্ৰে আৰু ন্যায়াধীশ সঞ্জয় শৰ্মাৰ খণ্ড বিচাৰপীঠে আবেদনখনৰ শুনানি গ্ৰহণ কৰে। অধিবক্তা ৰাকেশ কুমাৰ ছাইনীয়ে দাখিল কৰা আবেদনখনত কেন্দ্ৰীয় চৰকাৰ আৰু সংশ্লিষ্ট কৰ্তৃপক্ষক প্ৰতিবাদৰ ফলত ক্ষতিগ্ৰস্ত হোৱা নাগৰিকসকলৰ বাবে ক্ষতিপূৰণৰ ব্যৱস্থা কৰিবলৈ নিৰ্দেশ দিয়াৰ দাবী জনোৱা হৈছিল।
আবেদনকাৰীৰ অভিযোগ অনুসৰি, দিল্লীৰ জনবহুল অঞ্চলত অনুষ্ঠিত প্ৰতিবাদৰ ফলত যান-বাহন চলাচলত ব্যাঘাত জন্মাৰ লগতে ব্যৱসায়ী, যাত্ৰী, কৰ্মচাৰী আৰু বিদ্যালয়ৰ শিক্ষাৰ্থীসকলৰ দৈনন্দিন জীৱন প্ৰভাৱিত হৈছিল। প্ৰতিবাদৰ বাবে নিৰ্ধাৰিত সময় আৰু চৰ্ত উলংঘা কৰি প্ৰতিবাদস্থলী দখল কৰি ৰখাৰ অভিযোগো আবেদনখনত উত্থাপন কৰা হৈছিল।
আবেদনকাৰীয়ে ‘কমিউনিটি ফাইন’ বা সামূহিক জৰিমনাৰ ব্যৱস্থা প্ৰৱৰ্তনৰ দাবী জনাইছিল। তেওঁৰ যুক্তি আছিল যে প্ৰতিবাদৰ ফলত অসুবিধাৰ সন্মুখীন হোৱা সাধাৰণ নাগৰিকসকলক ক্ষতিপূৰণ দিয়াৰ ব্যৱস্থা থাকিলে ভৱিষ্যতে এনে ব্যাঘাত সৃষ্টি কৰা কাৰ্য ৰোধ কৰাত সহায়ক হ’ব। ক্ষতিগ্ৰস্ত নাগৰিকসকলৰ দাবী গ্ৰহণ আৰু ক্ষতিপূৰণৰ পৰিমাণ নিৰ্ধাৰণৰ বাবে এখন উচ্চস্তৰীয় সমিতি গঠনৰো আবেদন জনোৱা হৈছিল।
শুনানিৰ সময়ত আদালতে উল্লেখ কৰে যে একে বিষয়ৰ সৈতে জড়িত ৫০টাতকৈও অধিক আবেদন ইতিমধ্যে উচ্চতম ন্যায়ালয়ত বিচাৰাধীন হৈ আছে। কেন্দ্ৰীয় চৰকাৰৰ হৈ উপস্থিত থকা ছলিচিটৰ জেনেৰেল তুষাৰ মেহতাইও উচ্চতম ন্যায়ালয়ত একেধৰণৰ বিষয় বিবেচনাধীন হৈ থকাৰ কথা আদালতক অৱগত কৰে। তেওঁৰ মতে, প্ৰতিবাদৰ ফলত ব্যৱসায়িক কাৰ্যকলাপ ক্ষতিগ্ৰস্ত হোৱা বুলি দাবী কৰা সৰু ব্যৱসায়ীসকলেও উচ্চতম ন্যায়ালয়ৰ কাষ চাপিছে।
ইয়াৰ পাছতে দিল্লী উচ্চ ন্যায়ালয়ে কয় যে একে বিষয় উচ্চতম ন্যায়ালয়ত বিচাৰাধীন হৈ থকাৰ পৰিপ্ৰেক্ষিতত পৰস্পৰবিৰোধী নিৰ্দেশ জাৰি হোৱাৰ সম্ভাৱনা এৰাই চলিবলৈ উচ্চ ন্যায়ালয়ে এই গোচৰত হস্তক্ষেপ নকৰাই উচিত। আদালতে আবেদনখন নিষ্পত্তি কৰি আবেদনকাৰীক উচ্চতম ন্যায়ালয়ৰ কাষ চপাৰ স্বাধীনতা প্ৰদান কৰে।
উল্লেখযোগ্য যে, আদালতে আবেদনখনৰ মূল দাবীসমূহৰ গুণাগুণ বা বৈধতাৰ ওপৰত কোনো চূড়ান্ত সিদ্ধান্ত দিয়া নাই। গোচৰটোৰ নিষ্পত্তিৰ কাৰণ হৈছে একে বিষয় উচ্চতম ন্যায়ালয়ত বিচাৰাধীন হৈ থকা।
