গুৱাহাটী, ২৯ অক্টোবৰঃ বিপদৰ সময়ত মানৱীয়তাৰ পৰিচয় দি প্ৰশংসা বুটলিছে গুৱাহাটীৰ পৰা ডিব্ৰুগড় অভিমুখে চলাচল কৰা নৈশবাছ ‘আইদেউজান’ৰ কৰ্মচাৰীসকলে। যোৱা নিশা কাজিৰঙাৰ সমীপৰ জখলাবন্ধাত চলন্ত বাছখনৰ ভিতৰতে এগৰাকী মহিলাই এটি কন্যা সন্তান জন্ম দিয়ে। এনে জৰুৰী পৰিস্থিতিত বাছখনৰ চালক, হেণ্ডিমেন আৰু পৰিচালনাৰ সৈতে জড়িত কৰ্মচাৰীসকলে তৎপৰতাৰে মাতৃগৰাকীক সহায় কৰে।
জানিব পৰা মতে, যাত্ৰীৰে ভৰ্তি হৈ থকা বাছখনত হঠাৎ প্ৰসৱৰ পৰিস্থিতিৰ সৃষ্টি হয়। সেই সময়ত বাছখন ৰখাই পুৰুষ যাত্ৰীসকলক নমাই দিয়া হয় আৰু প্ৰসূতি মহিলাগৰাকীক সহায় কৰিবলৈ বাছৰ কৰ্মচাৰীসকল আগবাঢ়ি আহে। চালক বাবুল বৰপাত্ৰ, ৰাকিব আহমেদ, চাহাবুদ্দিনসহ কৰ্মচাৰীৰ দলটোৱে নিজৰ সামৰ্থ্য অনুসৰি প্ৰয়োজনীয় সহায় আগবঢ়ায়। তেওঁলোকৰ তৎপৰতাৰ মাজতে বাছখনৰ ভিতৰতে এটি সুস্থ কন্যা সন্তানৰ জন্ম হয় বুলি জানিব পৰা গৈছে।
মাতৃ আৰু নৱজাতকক চিকিৎসালয়লৈ নিয়াৰ ব্যৱস্থা
সন্তান জন্মৰ পিছতে মাতৃ আৰু নৱজাতকক প্ৰাৰম্ভিক সহায় আগবঢ়োৱা হয়। পৰৱৰ্তী সময়ত এম্বুলেন্সৰ সহায়ত দুয়োকে ওচৰৰ চিকিৎসালয়লৈ নিয়াৰ ব্যৱস্থা কৰে বাছখনৰ কৰ্মচাৰীসকলে।
ঘটনাটো মাজনিশা সংঘটিত হোৱাৰ সময়ত পৰিয়ালটোৱে যাতে চিকিৎসাৰ ক্ষেত্ৰত অসুবিধাৰ সন্মুখীন হ’বলগীয়া নহয়, তাৰ প্ৰতি লক্ষ্য ৰাখি বাছখনৰ মালিকেও ৫,০০০ টকাৰ আৰ্থিক সাহায্য আগবঢ়ায় বুলি জানিব পৰা গৈছে।
মানৱীয়তাৰ নিদৰ্শন ‘আইদেউজান’
যাত্ৰীক গন্তব্যস্থানলৈ লৈ যোৱাৰ দায়িত্বৰ লগতে জৰুৰী সময়ত এগৰাকী মাতৃ আৰু নৱজাতকৰ কাষত থিয় দি বাছখনৰ কৰ্মচাৰীসকলে মানৱীয়তাৰ নিদৰ্শন দাঙি ধৰিছে। তেওঁলোকৰ তৎপৰতা আৰু সহায়ৰ পদক্ষেপে ঘটনাটোক চৰ্চালৈ আনিছে।
এই ঘটনাই পুনৰ এবাৰ দেখুৱাই দিলে যে সংকটৰ মুহূৰ্তত সময়মতে আগবঢ়োৱা সহায়ে এগৰাকী মাতৃ আৰু নৱজাতকৰ বাবে কিমান গুৰুত্বপূৰ্ণ ভূমিকা পালন কৰিব পাৰে।
