নতুন দিল্লী: নিৰ্বাচনী তালিকাৰ সংশোধন প্ৰক্ৰিয়াত অনিয়মৰ অভিযোগ উত্থাপন কৰি মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত দেওবাৰে দিল্লীত প্ৰতিবাদ সাব্যস্ত কৰিবলৈ সাজু হৈছে INDIA মিত্ৰজোঁট। মিত্ৰজোঁটৰ ‘চলো দিল্লী’ কাৰ্যসূচীৰ বাবে দেওবাৰে পুৱাৰে পৰা ৰামলীলা ময়দানত বিভিন্ন বিৰোধী দলৰ সমৰ্থকসকল সমৱেত হ’বলৈ আৰম্ভ কৰে।
সমাজবাদী পাৰ্টীৰ কৰ্মীসকলক দলৰ মুৰব্বী অখিলেশ যাদৱৰ বাসগৃহৰ বাহিৰত সমৱেত হোৱা দেখা যায়। আনহাতে, কংগ্ৰেছৰ সমৰ্থকসকল হিমাচল ভৱনৰ সন্মুখত গোট খাই প্ৰতিবাদস্থলীলৈ যাত্ৰা কৰে। বিভিন্ন ৰাজ্যৰ পৰা দলীয় কৰ্মী আৰু সমৰ্থকসকল দিল্লীত উপস্থিত হৈছে।
দেওবাৰে দুপৰীয়া ১২ বজাত মিণ্টো ৰোড–কনট প্লেচ সংযোগস্থলৰ পৰা প্ৰতিবাদী সমদল আৰম্ভ হোৱাৰ কথা। সমদলৰ অন্তত ৰামলীলা ময়দানত অনুষ্ঠিত হ’ব বিৰোধী মিত্ৰজোঁটৰ সমাৱেশ। কংগ্ৰেছ সভাপতি মল্লিকাৰ্জুন খাৰ্গেৰ বাসগৃহৰ পৰা জ্যেষ্ঠ বিৰোধী নেতাসকলে মুকলি বাছত সমদলৰ আৰম্ভণিস্থলীলৈ যোৱাৰ পৰিকল্পনা কৰা হৈছে।
সমাৱেশত ১০ লাখলৈকে লোকৰ সমাগম হ’ব বুলি INDIA মিত্ৰজোঁটে আশা প্ৰকাশ কৰিছে। আনহাতে, দিল্লী আৰক্ষীয়ে প্ৰায় ৫০ হাজাৰ লোকৰ সমাগমৰ অনুমান কৰিছে। ৰামলীলা ময়দানত খালী অৱস্থাত ৪৫ হাজাৰৰ পৰা ৫০ হাজাৰ লোকৰ স্থান সংকুলান হ’ব পাৰে। কিন্তু আসন, বেৰিকেড আৰু নিৰ্দিষ্ট পথৰ ব্যৱস্থা কৰাৰ পাছত এই সংখ্যা ৩০ হাজাৰৰ পৰা ৪০ হাজাৰলৈ হ্ৰাস পাব পাৰে।
প্ৰতিবাদস্থলী আৰু সমদলৰ পথত নিৰাপত্তাৰ বাবে ৪,০০০ৰো অধিক আৰক্ষী জোৱানৰ লগতে কেন্দ্ৰীয় সশস্ত্ৰ আৰক্ষী বাহিনী মোতায়েনৰ ব্যৱস্থা কৰা হৈছে। ময়দানখন ১৪টা নিৰাপত্তা মণ্ডলত ভাগ কৰা হৈছে। নিৰীক্ষণৰ বাবে ২০০ৰো অধিক CCTV কেমেৰা, ড্ৰোন আৰু শৰীৰত সংলগ্ন কেমেৰা ব্যৱহাৰ কৰা হ’ব।
উল্লেখ্য যে, শনিবাৰে কংগ্ৰেছ সভাপতি মল্লিকাৰ্জুন খাৰ্গেৰ বাসগৃহত INDIA মিত্ৰজোঁটে মুখ্য নিৰ্বাচন আয়ুক্ত জ্ঞানেশ কুমাৰৰ বিৰুদ্ধে প্ৰতীকী ‘জনতাৰ মহাভিযোগ’ কাৰ্যসূচী গ্ৰহণ কৰিছিল। প্ৰাক্তন লোকসভাৰ অধ্যক্ষ মীৰা কুমাৰে এই কাৰ্যসূচীত সভাপতিত্ব কৰিছিল।
